Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 142 Hüküm no: 58 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un mirasından evin yarı hissesinin beytülmâl tarafından diğer Hatice’nin kocası Mahmud’a satıldığı Kezâlik akd-i meclis-i şer‘-i şerîf ettikde müteveffât-ı mezbûrenin verâseti zâhirde zevc-i metrûku es-Seyyid Mahmud Ağa b. Ahmed’den gayrı vâris-i ma‘rûfu olmamağın terekesinin nısfı zevci mezbûr es-Seyyid Mahmud Ağa’ya ve nısf-ı âhiri cânib-i beytülmâle âid oldukdan sonra mahmiye-i mezbûrede bi’l-fi‘il beytülmâl-i havâs emîni olan fahrü’l-akrân Mustafa Ağa b. Abdullah meclis-i ma‘kūd-ı mezbûrda işbu râfi‘ü’l-kitâb mezbûr es-Seyyid Mahmud Ağa b. el-mezbûr Ahmed mahzarında bi’l-emâne ikrâr ve takrîr-i kelâm edip müteveffât-ı mezbûrenin ile’l-vefât yedinde mülk ve hakkı olup mahalle-i mezbûrede vâki‘ bir tarafdan Semerci Vakfı’ndan İmâm İbrahim Efendi tarafında olan menzil ve bir tarafdan Abdülbaki Efendi mülkü ve bir tarafdan Akbıyık Vakfı’ndan olup Rumeli odaları demekle ma‘rûf müteehhilîn odaları ve bir tarafdan dahi tarîk-i âm ile mahdûd tabaka-i ulyâsı iki bâb oda ve bir sofa ve tabaka-i vüstâsı bir bâb oda ve kiler ve hâriciye ta‘bîr olunur fevkānî iki bâb oda ve süflâda bir matbah ve bir kârgîr mahzen ve bir ahır ve iki kenîf ve bir su kuyusu ve bir mikdâr havluyu müştemil mülk menzilin cânib-i beytülmâle âid olan nısf-ı âharını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile otuz altı bin akçeye mezbûr es-Seyyid Mahmud Ağa’ya bey‘ u temlîk ve teslîm ol dahi ber-vech-i muharrer iştirâ ve temellük ve tesellüm ve kabûl ettikden sonra semeni olan meblağ-ı merkūm otuz altı bin akçeyi yedinden tamâmen bi’l-emâne alıp kabz eyledim ba‘de’l-yevm menzil-i mahdûd-ı mezkûrun nısfı irsen ve nısf-ı âharı şirâen mezbûr es-Seyyid Mahmud Ağa’nın mülk ve hakkı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli kezâlik inhâ etmeğin mâ-vaka‘a kayd-şüd. Şuhûdü’l-hâl: Es-sâbikūn es-sâbikūn.