Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 151 Hüküm no: 67 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Efendi’nin oğlu Süleyman Ağa’nın, babasından intikal eden miras hakkının kardeşi Mehmed Efendi’nin terekesinden ödenmesi Mahmiye-i İstanbul’da Cevvîzâde mahallesinde sâkin bâ‘isü’l-kitâb Süleyman Ağa b. Mustafa meclis-i şer‘-i hatîr-ı lâzımü’t-tevkīrde mahalle-i mezbûre ahâlîsinden olup hacc-ı şerîfden gelirken vefât eden Mehmed Efendi b. Mustafa’nın zevce-i menkûha-i metrûkesi Şerife Âişe Hatun bt. es-Seyyid Ömer Çelebi tarafından husûs-ı âti’l-beyânda husûmet ve redd-i cevâba vekîl olduğu zâtını ma‘rifet-i şer‘iyye ile ârifân mahalle-i mezbûrede sâkin Ali Efendi b. Mustafa ve Mustafa Çelebi b. Receb şehâdetleriyle mahzar-ı hasm-ı câhidde sâbit olup sübût-ı vekâletine hükmolunan babası mezbûr es-Seyyid Ömer Çelebi b. Abdurrahman mahzarında üzerine da‘vâ ve takrîr-i kelâm edip vâlidemiz İsmihan Hatun bt. Abdullah mahrûse-i Edirne’de fevt oldukda ben İzmir’de bulunmağla vâlidemin terekesinden benim hisseme intikāl eden yüz on sekiz guruş hakkımı karındaşım merkūm Mehmed Efendi ahz u kabz ve mesârifine sarfla istihlâk edip hattâ zimmetinde bana ol kadar guruş deyni olduğunu huzûr-ı Müslimînde ikrâr ve işhâd edip bana dâmin olmadan fevt olmağla terekesine vaz‘-ı yed eden mezbûre Şerîfe Âişe’nin vekîli babası mezbûr es-Seyyid Ömer’den taleb ederim suâl olunsun dedikde gıbbe’s-suâl ve’l-inkâr müdde‘î-i merkūmdan müdde‘âsına beyyine taleb olundukda udûl-ı Müslimînden Süleymaniye mahallesinde sâkin İsmail Çelebi b. Mehmed ve nisâ-i sâlihâtdan zikr olunan Cevvîzâde mahallesinde sâkine Gülbuy bt. Abdullah ve Belkıs bt. Abdullah li-ecli’ş-şehâde meclis-i şer‘a hâzırûn olup isre’l-iştişhâd fi’l-hakīka müdde‘î-i mezbûrun li-ebeveyn karındaşı müteveffâ-yı mezbûr Mehmed Efendi b. Mustafa hâl-i kemâl-i sıhhatinde cihet-i merkūmeden mezbûr Süleyman Ağa’ya zimmetinde yüz on sekiz guruş deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm mâ-vaka‘a kayd-şüd. Fî 22 min-Muharrem sene 1110 Şuhûdü’l-hâl: İmâm Ali Efendi b. Mustafa, Mehmed Efendi b. ( ) Kâtib, Hasan Çelebi b. Abdullah, Hüseyin Çelebi b. İbrahim, Muhzır Kara Mehmed b. Hüseyin.