Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 150 Hüküm no: 66 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Efendi’nin hanımı Ayşe Hatun’a ait mehir bedelinin terekeden ödenmesi Mahmiye-i İstanbul’da Cevvîzâde mahallesi ahâlîsinden olup hacc-ı şerîfden gelirken vefât eden Mehmed Efendi b. Mustafa’nın verâseti zevce-i menkûha-i metrûkesi Şerife Âişe Hatun bt. es-Seyyid Ömer ile sulbî sagīr oğlu Abdullah’a münhasıra oldukdan sonra mezbûre Şerife Âişe Hatun tarafından husûs-ı âti’l-beyânda vekîl olduğu zâtını ma‘rifet-i şer‘iyye ile ârifân mahalle-i mezbûrede sâkin Ali Efendi b. Mustafa ve Mustafa Çelebi b. Receb şehâdetleri ile mahzar-ı hasm-ı câhidde sâbit olup sübût-ı vekâletine hükmolunan babası bâ‘isü’l-kitâb es-Seyyid Ömer Çelebi b. es-Seyyid Abdurrahman mahfil-i kazâda sagīr-i mezbûr Abdullah’ın tesviye-i umûruna kıbel-i şer‘den vasî nasb olunup bi-hasebi’l-vesâye terekesine vaz‘-ı yed eden Süleyman Ağa b. Mustafa mahzarında bi’l-vekâle üzerine da‘vâ ve takrîr-i kelâm edip müteveffâ-yı mezbûr Mehmed Efendi b. Mustafa tezevvüc murâd ettikde bundan yirmi bir sene mukaddem İzmir’de iki yüz elli guruş mehr-i müeccel tesmiyesiyle müvekkile-i mezbûremi tezevvüc ve kabûl edip hattâ müteveffâ-yı mezbûr hâl-i kemâl-i sıhhatinde zevcem mezbûre Şerife Âişe’nin zimmetimde iki yüz elli guruş mehr-i müeccel hakkı vardır deyü huzûr-ı Müslimînde ikrâr ve işhâd ettikden sonra müvekkile-i mezbûre mehr-i müecceli olan iki yüz elli guruşun elli guruşunu zevci merhûm Mehmed Efendi’ye hîbe-i tâm ile hîbe ol dahi kabûl ettikde meblağ-ı bâkī iki yüz guruşu kable’l-edâ fevt olmağla yed-i vasîde olan tereke-i vâfiyesinden taleb ederim suâl olunsun dedikde gıbbe’s-suâl ve’l-inkâr vekîl-i merkūm es-Seyyid Ömer Çelebi’den müdde‘âsına beyyine taleb olundukda udûl-ı Müslimînden zikr olunan Ali Efendi b. Mustafa ve Mustafa Çelebi b. Receb li-ecli’ş-şehâde meclis-i şer‘a hâzırân olup istişhâd olundukda fi’l-hakīka müteveffâ-yı mezbûr Mehmed Efendi b. Mustafa hâl-i kemâl-i sıhhatinde zevcem mezbûre Şerife Âişe Hatun’a zimmetimde iki yüz elli guruş mehr-i müeccel deynim vardır deyü huzûr-ı Müslimînde ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın meblağ-ı mevhûbundan gayrı bâkī kalan iki yüz guruş hakkını zevci müteveffâ-yı mezbûrdan almayıp ve turuk-ı şer‘iyyeden bir tarîk ile zimmetini ibrâ etmediğine müvekkile-i mezbûre ber-vech-i şer‘î üzere tahlîf olundukdan sonra mûcebiyle ba‘de’l-hükm mâ-vaka‘a kayd-şüd. Fî 20 Muharrem sene 1110 Şuhûdü’l-hâl: İsmail Çelebi b. Mehmed, Mehmed Efendi b. ( ) Kâtib, Abdurrahman Efendi b. Ahmed, Hasan Çelebi b. Abdullah, Abdülmuti Efendi b. ( ), Mukayyid Mustafa Efendi b. Mehmed.