Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 152 Hüküm no: 69 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman’ın evini müştemilatıyla birlikte Abdullah Efendi’ye sattığı Mahmiye-i İstanbul’da Davudpaşa mahallesinde sâkin el-Hâc Süleyman b. Ahmed mahfil-i kazâda mahalle-i mezbûrede sâkin işbu bâ‘isü’l-kitâb İbâdzâde es-Seyyid Abdullah Efendi b. el-merhûm es-Seyyid Mustafa Efendi mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm olup mahmiye-i mezbûrede Mimâr Acem İsa mahallesinde vâki‘ bir tarafdan Mustafa Çelebi menzili ve hamam ve iki tarafdan Süleyman Ağa b. İbrahim menzili ve bir tarafdan tarîk-i âmla mahdûd hâriciye ve dâhiliye fevkānî ve tahtânî büyût-ı adîde ve hamam ve köşk ve büyük bahçeyi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık bey‘-i bâtt-ı kat‘î ile mezbûr es-Seyyid Abdullah Efendi’ye bin altı yüz guruşa bey‘ u temlîk ve teslîm ol dahi iştirâ ve tesellüm ve kabûl ettikden sonra semeni olan meblağ-ı mezbûr bin altı yüz guruşu merkūm es-Seyyid Abdullah Efendi yedinden tamâmen ahz u kabz eyledim ba‘de’l-yevm menzil-i mahdûd-ı mezkûr müşteri-yi mezbûr es-Seyyid Abdullah Efendi’nin mülk-i müşterâsı ve hakk-ı sırfı olmuşdur keyfe mâ yeşâ ve hasbe mâ yehtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min-Muharremi’l-harâm li-seneti aşer ve mi’ete ve elf. Şuhûdü’l-hâl: Kıdvetü’l-meşâyihi’l-kirâm Mimâr …? şeyhi es-Seyyid eş-Şeyh Ahmed Efendi, Ali Efendi b. Ahmed el-İmâm, Şeyhzâde Ahmed Çelebi el-Müezzin, el-Hâc Mehmed b. el-Hâc Abdi, Derviş İbrahim b. Mehmed, Mustafa b. Mehmed.