Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 153 Hüküm no: 70 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma Hatun ile kardeşi Hatice’nin ortak oldukları arsayı Eyan, Roşa ve Taronde’ye sattıkları Mahmiye-i İstanbul’da Hüseyin Ağa mahallesinde sâkinelerinden Fâtıma Hatun bt. Mehmed b. Abdullah tarafından husûs-ı âti’l-beyânda vekîl olduğu zât-ı mezbûreyi ma‘rifet-i şer‘iyye ile ârifân mahmiye-i mezbûrede Kabasakal Sinan Ağa mahallesinde sâkin Hüseyin Çelebi b. Süleyman ve İbrahim Beşe b. Mehmed şehâdetleriyle mahzar-ı hasm-ı câhidde şer‘an sâbit ve sübût-ı vekâletine hükmolunan kız karındaşı Hadîce Hatun bt. Mehmed kendi tarafından asâleten ve mezbûre tarafından vekâleten meclis-i şer‘-i hatîr-ı lâzımü’t-tevkīrde bâ‘isü’s-sifr Eyan v. Dökentci(?) ve Roşa v. Eyan ve Taronde bt. Kaplan nâm zimmîler mahzarında ikrâr ve takrîr-i kelâm edip mahmiye-i mezbûrede Şeyh Ferhad mahallesinde vâki‘ bir tarafdan yine benim mülküm ve bir tarafdan Kirok zimmî mülkü ve bir tarafdan Hayt zimmî mülkü ve bir tarafdan tarîk-i âm ile mahdûd olup Ayasofya-i kebîr vakfına senede yirmi dört akçe mukāta‘a-i kadîmesi olan arsa-i hâliyenin nısfı benim ve nısf-ı âharı kız karındaşım müvekkile-i mezbûrenin mülkümüz olmağla hâlâ arsa-i mezbûreyi nıkzıyla yüz on guruşa merkūmûn Eyan ve Roşa ve Taronde’ye ale’l-iştirâk tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip onlar dahi vech-i muharrer üzere iştirâ ve tesellüm ve kabz ettiklerinden sonra semeni olan meblağ-ı merkūm yüz on guruşu asâleten ve vekâleten yedlerinden tamâmen ahz u kabz eyledim fîmâ-ba‘d arsa-i merkūme merkūmûnun mülk-i müşterâlarıdır keyfe mâ teşâ ve tehtâr mutasarrıf olsunlar dedikde gıbbe’t-tasdîkı’ş-şer‘î mâ-vaka‘a kayd-şüd. Fî 29 Muharrem sene 1110 Şuhûdü’l-hâl: el-Hâc Mustafa b. Osman, Mahmud Çelebi b. Hasan, Süleyman Çelebi b. Mehmed, İbrahim Çelebi b. Abdullah, Ali Çelebi b. Abdullah, es-Seyyid Mehmed Çelebi b. ( ).