Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 157 Hüküm no: 75 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz’in vefat eden Serkâtib Ahmed Ağa’daki alacağının terekeden ödenmesi Dergâh-ı âlî kapıcıbaşılarından olup bundan akdem medyûnen vefât eden merhûm Ser-kâtib Ahmed Ağa b. Mustafa’nın dâyinlerinden mahmiye-i İstanbul’da Bedestân-ı Cedîd’de sâkin işbu bâ‘isü’l-vesîka Serkiz v. David nâm Ermeni meclis-i şer‘-i şerîfde müteveffâ-yı mezbûrun zevce-i menkûha-i metrûkesi Rukiye Hatun bt. İsmail Ağa’nın vekîl-i müsecceli Abdullah Ağa b. Haydar Paşa ve vasiyy-i mansûbu olmağla terekesine vaz‘-ı yed eden İsmail Ağa b. Hüseyin mahzarlarında üzerlerine da‘vâ ve takrîr-i kelâm edip yedimde olan işbu deyn temessüğü ve pusula mûcebince merhûm-ı mezbûr Ser-kâtib Ahmed Ağa b. Mustafa zimmetinde cihet-i karzdan ve eşyâ-i ma‘lûme bahâsından zahriyeden mâ‘adâ ba‘de külli’l-hesâb üç yüz elli dokuz guruşla yüz sağ akçe hakkım olup hattâ merhûm-ı mûmâ-ileyh hâl-i kemâl-i sıhhatinde meblağ-ı mezbûr ba‘de külli’l-hesâb zimmetinde bana vâcibü’l-edâ deyni olduğunu fevtinden iki ay mukaddem şuhûd mahzarında ikrâr ve işhâd ettiğinden sonra kable’l-edâ vefât etmeğin terekesinden taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan sıdk-ı makāline beyyine taleb olundukda udûl-ı Müslimînden Dâye Hatun mahallesinde sâkin Mustafa Çelebi b. Haydar Paşa ve Hüseyin Çelebi b. Abdullah li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ merhûm-ı mûmâ-ileyh Kapıcıbaşı Ser-kâtib Ahmed Ağa b. Mustafa hâl-i kemâl-i sıhhatinde meblağ-ı mezbûr üç yüz elli dokuz guruşla yüz sağ akçe zahriyeden mâ‘adâ temessük ve pusula mûcebince ba‘de külli’l-hesâb müdde‘î-i mezbûr Serkiz’e vâcibü’l-edâ zimmetinde deyni olduğunu fevtinden iki ay mukaddem huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olup müdde‘î-i mezbûr Serkiz tahlîf-i şer‘î ile tahlîf olundukdan sonra mûcebiyle ba‘de’l-hükm mâ-vaka‘a kayd-şüd. Fî 27 min-Muharrem sene 1110 Şuhûdü’l-hâl: es-Seyyid Mehmed Efendi el-Müderris, Mustafa Efendi ed-dâyin, Şatır İbrahim Bey ed-dâyin, Yahya Bey Helvacı, Haffâf el-Hâc Hüseyin, Hüseyin Çelebi b. Mehmed, el-Hâc Abdullah Çukadâr.