Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 156 Hüküm no: 74 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Camcı Hüseyin’in vasisi Mehmed Çelebi’nin terekeden bazı eşyaları sakladığı iddiasıyla Hüseyin’in hanımı Rukiye’ye açtığı davayı ispat edemediği Mahmiye-i İstanbul’da Çinilihamam kurbünde sâkin iken düyûnu terekesinden ezyed olduğu hâlde vefât eden Camcı es-Seyyid Hüseyin Çelebi b. es-Seyyid Veli b. Mahmud’un vasiyy-i muhtârı es-Seyyid Mehmed Çelebi b. es-Seyyid Ahmed mahfil-i kazâda müteveffâ-yı mezbûrun zevce-i menkûha-i metrûkesi olup zâtı ta‘rîf-i şer‘î ile mu‘arrefe olan bâ‘isetü’l-kitâb Rukiye bt. el-Hâc Hasan mahzarında üzerine da‘vâ ve takrîr-i kelâm edip müteveffâ-yı mezbûrun terekesinden mecmû‘u iki yüz yirmi guruş kıymetli sekiz çift kadife yastık ve üç çift beledî yastık ve dört döşek ve sekiz yemenî yorgan ve yedi minder ve iki orta keçe ve iki yan keçe ve bir Mushaf-ı şerîf ve iki Yanbolu kebesi ve sekiz yemenî yastık ve bir la‘l yüzük ve bir hâtem ve bir kebîr sini ve bir leğen ve kırk altı vukıye evânî-i nühâsiyesini mezbûr Rukiye ketm ü ihfâ etmekle dâyinlere def‘ ve red içün bi’l-vesâye taleb eylediğimde mezbûre Rukiye bana teslîmden imtinâ‘ eder suâl olunsun dedikde gıbbe’s-suâl ve akībe’l-inkâr müdde‘î-i mezbûr es-Seyyid Mehmed Çelebi’den sıdk-ı makāline beyyine taleb olundukda ityân-ı beyyineden ızhâr-ı acz ile istihlâf etmeğin fi’l-hakīka müteveffâ-yı mezbûrun terekesinden olup zikr olunan eşyâyı ketm ü ihfâ etmeyip üzerine redd ü damân lâzım olmadığına mezbûre Rukiye’ye yemîn teklîf olundukda ol dahi hasbe’l-mesûl yemîn billâhi’l-aliyyi’l-a‘lâ etmeğin mûcebince vasiyy-i mezbûr es-Seyyid Mehmed Çelebi bilâ-beyyine eşyâ-i mezkûre talebiyle mezbûre Rukiye’ye bî-vech mu‘ârazadan men‘ olunup mâ-vaka‘a kayd-şüd. Fî 12 Muharrem sene 1110 Şuhûdü’l-hâl: Mukayyid Mustafa Efendi b. Mehmed, es-Seyyid Abdullah Efendi İbâdzâde, Hüseyin Çelebi b. Mehmed Muhzır, Seyyid Musa Çelebi b. ( ), İmâmzâde Mehmed Efendi, Yahya Efendi b. Mustafa Efendi, İbrahim Beşe b. Musa, Kaf(?)zâde es-Seyyid Abdullah Efendi.