Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 161 Hüküm no: 77 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Serkâtib Ahmed Ağa ile hanımı Rukiye’ye olan borçlarını ödeyemediğinden hapiste olan Muharrem Kethüda’nın kefaletle serbest bırakıldığı Dergâh-ı âlî kapıcıbaşılarından olup bundan akdem vefât eden Ser-kâtib Ahmed Ağa b. Mustafa’ Efendi’ye üç yüz yetmiş yedi buçuk guruş ve zevce-i metrûkesi Rukiye Hatun bt. İsmail Ağa’ya sekiz bin akçe deynleri olmağla on bir aydan beri sicn-i sultânîde mahbûs olup Havâss-ı aliyye kazâsına tâbi‘ Çatalca kasabasında sâkin Muharrem Kethüdâ b. Abdullah’dan istişhâd-ı şer‘î sudûrundan sonra kasaba-i mezbûre sükkânından İbrahim b. Abdullah ve diğer İbrahim Beşe b. Abdi ve es-Seyyid Abdullah Çelebi b. Sefer ve Bostânî el-Hâc Mustafa Ağa b. Murad nâm kimesneler fi’l-vâki‘ işbu medyûn-ı mezbûr Muharrem deyn-i mezbûru bir vechile edâya iktidârı olmayıp ve hâlâ üzerinde lâbis olduğu işbu köhne libâsından gayrı bir ismi mal ıtlâk olunur bir şeye malik değildir müflis ve mu‘demdir deyü her biri müteveffâ-yı mezbûrun vasiyy-i mansûbu İsmail b. Hüseyin ve mezbûre Rukiye Hatun’un vekîl-i müsecceli Abdullah Ağa b. Hayda[r] Paşa’nın muvâcehelerinde medyûn-ı mezbûrun iflâsına alâ-tarîkı’ş-şehâde haber verip ve mezbûrân İsmail Ağa ve Abdullah Ağa’nın îsârına beyyineleri olmamağla vüs‘at-i hâl ve vefret-i malına değin mezbûr Muharrem habsden ıtlâk olunup ve mezbûr es-Seyyid Abdullah Çelebi mezbûrun nefsine vakt-i mutâlebede meclis-i şer‘a ihzârına kefîl olmağın işbu vesîka bi’t-taleb kayd-şüd. Fî gurreti Saferi’l-hayr sene 1110 Şuhûdü’l-hâl: Umdetü’l-meşâhiyi’l-himme Ebubekir Efendi b. eş-Şeyh Ali Efendi, eş-Şeyh Mehmed Efendi Üsküdarî, İbrahim Beşe tâbi‘-i vekîl-i Abdi, Şatır İbrahim Bey ed-dâyin, Çukadâr el-Hâc Abdullah.