Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 162 Hüküm no: 78 Orijinal metin no: [24a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çukacı Pandeli’nin vefat eden Serkâtib Ahmed Ağa’daki alacağının terekeden ödenmesi Dergâh-ı âlî kapıcıbaşılarından olup medyûnen vefât eden Ser-kâtib Ahmed Ağa b. Mustafa Efendi’nin dâyinlerinden olup mahmiye-i İstanbul’da Bezzâzistân-ı Cedîd’de sâkin Çukacı Pandeli v. Kostandil mahfil-i kazâda müteveffâ-yı mûmâ-ileyhin zevce-i metrûkesi Rukiye Hatun bt. el-merhûm İsmail Ağa’nın vekîl-i müsecceli Abdullah Ağa b. Haydar Paşa ve tesviye-i umûruna vasî ve kayyım nasb olunmağla terekesine vaz‘-ı yed eden İsmail Ağa b. Hüseyin mahzarlarında üzerlerine da‘vâ ve takrîr-i kelâm edip müteveffâ-yı merkūm Ser-kâtib Ahmed Ağa b. Mustafa Efendi zimmetinde cihet-i karz-ı şer‘îden yüz guruş ve beynimizde ma‘lûm eşyâ bahâsından dahi yirmi sekiz guruş cem‘an yüz yirmi sekiz guruş hakkım olup hattâ hâl-i kemâl-i sıhhatinde şuhûd mahzarında ikrâr ve işhâd etdikden sonra kable’l-edâ vefât etmeğin terekesinden taleb ederim suâl olunsun dedikde gıbbe’s-suâl ve’l-inkâr ve isr-i talebi’l-beyyine [24b] mahmiye-i mezbûrede Bayezid-i Cedîd mahallesinde sâkin Hüseyin Ağa b. Abdülkerim ve merhûm-ı mûmâ-ileyhin şâtırı İbrahim Bey b. Hüseyin li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ müteveffâ-yı merkūm Ser-kâtib Ahmed Ağa b. Mustafa Efendi hâl-i kemâl-i sıhhatinde cihet-i karzdan yüz guruş ve beynlerinde ma‘lûm eşyâ bahâsından dahi yirmi sekiz guruş cem‘an yüz yirmi sekiz guruş müdde‘î-i mezbûr Çukacı Pandeli’ye vâcibü’l-edâ zimmetinde deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın müdde‘î-i mezbûr Pandeli tahlîf-i şer‘î ile tahlîf olundukdan sonra mûcebince ba‘de’l-hükm mâ-vaka‘a kayd-şüd. Fî 25 Muharrem sene 1110 Şuhûdü’l-hâl: Mustafa Efendi b. Hüseyin, Yahya Çelebi Hulvânî, el-Hâc Abdullah Çukadâr, Hüseyin b. Mehmed, Ahmed b. Süleyman, el-Hâc Halil b. Abdi.