Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 167 Hüküm no: 83 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâkine’nin Ayşe Hatun’un ölmeden önce kendisini azat ettiğini ispat ettiği Husûs-ı âti’l-beyânın mahallinde istimâ‘ ve tahrîri içün savb-ı şer‘den bi’t-taleb irsâl olunan Mevlânâ Ahmed Efendi b. el-merhûm Mehmed Efendi mahmiye-i İstanbul’da Dâye Hatun mahallesinde sâkine iken bundan akdem vefât eden Âişe Hatun bt. Mehmed’in menziline varıp zeyl-i sahîfede muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffât-ı mezbûrenin rıkk-ı sâbıkını mu‘terife işbu açık kaşlı sarı elâ gözlü orta boylu Hırfetiyyetü’l-asl [Hırvatiyyü’l-asl] hâfızatü’l-kitâb Sâkine bt. Abdülvahab meclis-i ma‘kūd-ı mezbûrda müteveffât-ı mezbûrenin zevci olup rıkka olup terekeden olmak üzere kendüye vaz‘u’l-yed olan Mir Mehmed Ağa b. Mehmed mahzarında üzerine da‘vâ ve takrîr-i kelâm edip seyyidem müteveffât-ı mezbûre Âişe Hatun bt. Mehmed hâl-i marazında fevtinden altı gün mukaddem hasbeten lillâhi te‘âlâ huzûr-ı Müslimînde malından tahrîr ve i‘tâk edip fevtinden sonra terekesinin sülüsü fetâ kıymetimin sülüsânı olan altmış guruşa müsâ‘id olmağın ben hürre olmuş iken mezbûr Mir Mehmed Ağa bana bi-gayr-ı hakkın vaz‘-ı yed eder suâl olunup sebîlim tahliye olunmak matlûbumdur dedikde gıbbe’s-suâl mezbûr Mir Mehmed Ağa cevâbında mevsûfe-i mezbûre[ye] ber-vech-i muharrer vaz‘-ı yedini ikrâr ve vech-i meşrûh üzere müdde‘âsını inkâr edicek müdde‘iye-i mezbûreden sıdk-ı makāline beyyine taleb olundukda udûl-ı Müslimînden mahalle-i mezbûre ahâlîsinden umdetü’l-müderrisîni’l-kirâm Murad Efendi b. Ali ve Mehmed Efendi b. Süleyman li-ecli’ş-şehâde meclis-i <<şer‘>> ma‘kūd-ı mezbûra hâzırân olup isre’l-istişhâd fi’l-hakīka müteveffât-ı mezbûre Âişe Hatun bt. Mehmed hâl-i marazında fevtinden on altı gün mukaddem müdde‘iye-i mezbûre Sâkine’yi mülkünde olduğu hâlde hasbeten lillâhi te‘âlâ huzûrumuzda malından tahrîr ve i‘tâk edip fevtinden terekesinin sülüsü fetâ kıymetinin sülüsânı olan altmış guruşa müsâ‘id olmağla mevsûfe-i mezbûre Sâkine hürre olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an mürsel Ahmed Çelebi b. Süleyman ve Mehmed b. Ali ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî gurreti Safer sene 1110 Şuhûdü’l-hâl: el-Hâc Mustafa b. Hüseyin, Mehmed Efendi b. Mehmed, el-Hâc Ali b. Hüseyin, Ahmed Çelebi b. ( ) ve gayruhum.