Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 168 Hüküm no: 84 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice’nin vasiliğini bırakan Süleyman’ın yerine tayin edilen annesi Emine Hatun’un Süleyman’dan çocuğa ait miras hissesini teslim aldığı Mahmiye-i İstanbul’da Kapı Ağası Mahmud Ağa mahallesi ahâlîsinden iken bundan akdem vefât eden İbrahim Ağa b. Üveys’in sagīr[e] kızı Hadîce’[nin] tesviye-i umûruna kıbel-i şer‘den mansûb vasîsi el-Hâc Süleyman b. ( ) mahfil-i kazâda ikrâr ve takrîr-i kelâm edip ben umûr-ı vesâyet-i merkūmeden hüsn-i ihtiyârımla kasr-ı yed eyledim dedikde emr-i vesâyet hâliye kalmağın yerine emânet ve diyânet ile ma‘rûfe idiği zeyl-i kitâbda isimleri mastûr Müslimîn haberleriyle mütehakkik ve zâtı mahalle-i merkūme sâkinlerinden Hâfız Mehmed Efendi b. Süleyman ve Sinan Ağa b. Mehmed ta‘rîfleriyle mu‘arrefe olan sagīre-i mersûmenin vâlidesi Emine Hatun bt. Mehmed tesviye-i umûr-ı sagīre-i mezbûreye vakt-i rüşd ü sedâdına varınca kıbel-i şer‘den vasî nasb ü ta‘yîn olundukda ol dahi vesâyet-i merkūmeyi kabûl ve hizmet-i lâzımesini edâya müte‘ahhide oldukdan sonra mezbûre Emine Hatun meclis-i şer‘de merkūm el-Hâc Süleyman muvâcehesinde bi’l-vesâye ikrâr ve takrîr-i kelâm edip mezbûr el-Hâc Süleyman’ın defter-i kassâm-ı askerî nâtık olduğu üzere sagīre-i mezbûrenin hisse-i müntakilesi olup bi’l-vesâle kabz eylediği para üç akçe hesâbı üzere dört bin doksan üç akçeyi hâlâ vesâyetim hasebiyle yedinden tamâmen ahz u kabz eyledim meblağ-ı merkūmdan yedinde bir akçe bâkī kalmadı dedikde gıbbe’t-tasdîkı’ş-şer‘î mâ-vaka‘a kayd-şüd. Fî 4 min-Safer sene 1110 Şuhûdü’l-hâl: Sinan Ağa b. Mehmed, Hâfız Mehmed Efendi b. Süleyman, Mehmed Bey b. Mehmed, Ali Bey b. Hasan, Mustafa b. Abdullah, Ahmed Çelebi b. Süleyman.