Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 173 Hüküm no: 90 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Abdullah’ın varislerinden Mehmed’in kendisine intikal eden hissesini diğer varislerin vasilerinden teslim aldığı Mahmiye-i İstanbul’da Kasab Demirhan mahallesinde sâkinen fevt olan Abdullah b. el-Hâc Hızır’ın verâseti vâlidesi Âişe bt. Abdurrahman’a ve li-ebeveyn kız karındaşları Fâtıma ve Rukiye nâm sagīrelere ve li-ebeveyn ammi Mehmed b. Ömer nâm kimesne[ye] münhasıra ve tashîh-i meselesi altı sehmden olmağla sihâm-ı mezbûrenin bir sehmi vâlidesi mezbûreye ve ikişer sehmi sagīretân-ı mezbûretândan her birine ve bâkī bir sehmi mezbûr Mehmed’e isâbeti tahakkukundan sonra mezbûr Mehmed mahfil-i kazâda sagīretân-ı mezbûretânın vasiyy-i muhtârları hâfızü’l-kitâb Mustafa b. Halil mahzarında ikrâr ve takrîr-i kelâm edip mûrisimiz sagīr-i mezbûr fevt oldukda ben âhar diyârda bulunmağla terekesi vâlidesi mezbûre ile sagīretân-ı mezbûretân beynlerinde alâ-vechi’r-red mukassem olundu hâlen ben gelip müteveffâ-yı mezbûrun li-ebeveyn ammi ve usûbet-i nesebiye cihetinden vârisi olduğumu hâkim-i muvakkı‘-i sadr-ı kitâb huzûrunda ba‘de’l-isbât ve’l-hükm sagīretân-ı mezbûretândan bana seksen dört guruş redd ü teslîm lâzım gelmeğin meblağ-ı mezbûr seksen dört guruşu sagīretân-ı mezbûretânın hisselerinden olmak üzere vasiyy-i mezbûr Mustafa yedinden tamâmen alıp kabz eyledim dedikde gıbbe’t-tasdîkı’ş-şer‘î mâ-vaka‘a kayd-şüd. Fî 10 Muharrem sene 1110 Şuhûdü’l-hâl: el-Hâc Ahmed b. Abdullah, Mehmed Beşe b. Mahmud, el-Hâc Mustafa b. Hüseyin, Ahmed b. Süleyman ve gayruhum.