Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 172 Hüküm no: 89 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Duacızade Abdullah Efendi’nin Harrât Kemâl mahallesi avarız vakfına olan borcunun terekesinden tahsil edilmesi Mahmiye-i İstanbul’da Harrât Kemâl mahallesi avârızının nukūd-ı mevkūfesine hâlâ mütevellî olan Manav Ahmed Efendi b. ( ) tarafından husûs-ı âti’l-beyânda vekîl olduğu mahalle-i mezbûre ahâlîsinden Abdülbaki b. Ahmed ve İbrahim b. Mehmed şehâdetleriyle mahzar-ı hasm-ı câhidde sâbit ve sübût-ı vekâletine hükmolunan bâ‘isü’l-kitâb Mehmed Efendi b. İbrahim meclis-i şer‘-i hatîr-ı lâzımü’t-tevkīrde mahmiye-i mezbûrede Hoca Üveys mahallesinde sâkin iken bundan akdem vefât eden Du‘âcızâde Abdullah Efendi b. Mustafa b. Himmet’in sagīre kızı Âişe’nin tesviye-i umûruna vasiyy-i muhtârı olmağla terekesine vaz‘-ı yed eden Şa‘bân Çelebi b. Mehmed mahzarında üzerine da‘vâ ve takrîr-i kelâm edip müteveffâ-yı mezbûr Du‘âcızâde Abdullah Efendi vakf-ı mezbûra kāimmakām-ı mütevellî iken asıl mal-ı vakf-ı mezbûrdan yüz yirmi guruş kabz edip meblağ-ı mezbûrun yirmi guruşunu kendi mesârifine sarfla istihlâk etmekle zimmetinde cânib-i vakfa deyni olduğunu ve bâkī kalan yüz guruşu rehin ve kefîl alınmaksızın <> Cebeciler kâtibi Ali Efendi nâm müteveffâya idâne edip ba‘dehû mezbûr Ali Efendi düyûnu terekesinden ezyed olduğu hâlde fevt olmağla guremâsından ancak yirmi bir guruş cânib-i vakfa vâsıl olup bâkī yetmiş dokuz guruşu cânib-i vakfa dâmin oldum zimmetimde ciheteyn-i mezbûreteynden cem‘an doksan dokuz guruş vâcibü’l-edâ deynimdir deyü merkūm Abdullah Efendi b. Mustafa b. Himmet fevtinden yirmi gün mukaddem huzûr-ı Müslimînde ikrâr ve işhâd edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı ahrâr-ı ricâl-i Müslimînden zikr olunan Harrât Kemâl mahallesi ahâlîsinden Hamamcızâde Ahmed Ağa b. Ali ve Mehmed Efendi b. İbrahim li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Du‘âcızâde Abdullah Efendi b. Mustafa b. Himmet fevtinden yirmi gün mukaddem ciheteyn-i mezbûreteynden vakf-ı mezbûra doksan dokuz guruş zimmetimde vâcibü’l-edâ deynimdir deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın müvekkil-i mezbûrun bu husûsda sun‘u olmamağla yemîn teveccüh etmeyip mûcebiyle ba‘de’l-hükm mâ-vaka‘a kayd-şüd. Fî gurreti Safer sene 1110 Şuhûdü’l-hâl: Osman Çelebi b. Hüseyin, Mehmed Efendi b. Musa el-İmâm, Mahmud b. Ali, Ömer b. Mustafa, Abdülbaki Çelebi b. Mehmed, Berber Mehmed Çelebi b. Süleyman.