Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 175 Hüküm no: 92 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sitti Hatun’un, vefat eden kocası Osman Ağa’nın vefat eden Mehmed’de olan alacak davasında sulh olduğu Husûs-ı âti’l-beyânın mahallinde ketb ü tahrîri içün savb-ı şer‘-i mutahhardan bi’t-taleb irsâl olunan Ahmed Efendi b. el-merhûm Mehmed Efendi mahmiye-i İstanbul’da Rüstempaşa Câmi‘-i şerîfi kurbünde el-Hâc Osman’ın odasına varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde Galata kazâsına tâbi‘ kasaba-i Fındıklı’da Sultan Süleyman Hân mahallesi ahâlîsinden olup bundan akdem vefât eden Osman Ağa b. el-Hâc Ali’nin verâseti zevce-i menkûha-i metrûkesi Sitti Hatun bt. el-Hâc Hasan’a ve evlâd-ı sıgārı Mustafa ve Ahmed ve Abdullah’a münhasıra olup kable’l-kısme sagīr-i mezbûr Mustafa dahi fevt olup verâseti vâlidesi mezbûre Sitti Hatun ile li-ebeveyn karındaşları mezbûrân Ahmed ve Abdullah’a münhasıra olup kable’l-kısme mezbûr Ahmed dahi vefât edip verâseti vâlidesi mezbûre Sitti Hatun ile li-ebeveyn karındaşı merkūm Abdullah’a münhasıra olup kable’l-kısme mezbûr Abdullah dahi fevt olup verâseti vâlidesi mezbûre Sitti Hatun’a münhasıra olduğu şer‘an zâhir oldukdan sonra zâtı hâlâ zevci Süleyman Efendi b. Abdurrahman ve Süleyman Çelebi b. Sinan ta‘rîfleriyle mu‘arrefe olan mezbûre Sitti Hatun meclis-i ma‘kūd-ı mezbûrda mahmiye-i mezbûrede Samanveren mahallesi ahâlîsinden olup bundan akdem vefât eden el-Hâc Mehmed b. el-Hâc Hamuda’nın evlâd-ı sıgārı Mehmed ve Mustafa ve Hadîce ve Emine’nin tesviye-i emrlerine vasiyy-i muhtârları el-Hâc Ahmed b. Mehmed mahzarında ikrâr ve takrîr-i kelâm edip zevcim müteveffâ-yı mezbûr Osman Ağa’nın mezbûr el-Hâc Mehmed’e dört yüz elli guruş deyni olup mukābelesinde zikr olunan Süleymaniye mahallesinde vâki‘ lede’l-ahâlî ma‘lûmü’l-hudûd menzili rehne vaz‘ ve teslîm ettikden sonra kable’l-edâ ve’l-fek mezbûr Osman Ağa fevt olup verâseti bana münhasıra olmağla zikr olunan dört yüz elli guruşun dört yüz on guruşu mukābelesinde eşyâ-i memlûkemden bir mücevher kuşak ve bir zümrüd küpe ve yirmi dört miskāl altın bilezik ve bir serâser perdeyi müteveffâ-yı merkūm el-Hâc Mehmed b. el-Hâc Hamuda’ya hayâtında bey‘ ve teslîm etmiş idim el-hâletü hâzihi eşyâ-i mezbûreden ve sâir müteveffâ-yı mezbûrun terekesinde müte‘allıka âmme-i da‘vâdan müteveffâ-yı merkūm el-Hâc Mehmed’in veresesinin zimmetlerini ibrâ-i âmm-ı kâtı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Ahmed Çelebi b. Süleyman ve İbrahim b. Mehmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 3 min-Saferi’l-hayr sene 1110 Şuhûdü’l-hâl: Kasım Çelebi b. Ömer, el-Hâc Süleyman b. Sinan, Osman Çelebi b. Mustafa, Ali Çelebi b. Mehmed, Kara Mehmed b. ( ), Yusuf b. Abdullah.