Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 176 Hüküm no: 93 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı Gülbuy Hatun’un hür olduğunu ve müteveffa Rahime Hatun’un bazı eşyalarını da kendisine hibe ettiğini ispat ettiği Husûs-ı âti’l-beyânın mahallinde istimâ‘ ve tahrîr[i] iltimâs olunmağın savb-ı şer‘den me’zûnen irsâl olunan Mevlânâ Mehmed Efendi b. Mahmud mahmiye-i İstanbul’da Koruk Mahmud mahallesinde sâkine iken bundan akdem vefât eden Rahime Hatun bt. el-Hâc Ali’nin menziline varıp zeyl-i kitâbda isimleri mastûr Müslimîn huzûrlarında akd-i meclis-i şer‘-i şerîf ettikde müteveffât-ı mezbûrenin verâseti kebîre kızları Emine ve Âişe bintey Hızır ile li-ebeveyn karındaşı olup hâlâ Mısr-ı Kāhire’de olan İbrahim Beşe nâm gāibe münhasıra olduğu mukarrer oldukdan sonra müteveffât-ı mezbûreye rıkk-ı sâbıkını mu‘terife olan işbu orta boylu açık kaşlı elâ gözlü Rusiyyetü’l-asl bâ‘isetü’l-kitâb Gülbuy bt. Abdullah meclis-i ma‘kūd-ı mezkûrda gāib-i mezbûrun hisse-i mevkūfesini zabt ve hıfza kıbel-i şer‘den vasî ve kayyım nasb olunan Mehmed Beşe b. Mustafa mahzarında üzerine da‘vâ ve takrîr-i kelâm edip seyyidem müteveffât-ı mezbûre Rahime Hatun bt. el-Hâc Ali fevtinden iki buçuk sene mukaddem mülkünde iken huzûr-ı Müslimînde malından beni tahrîr ve i‘tâk ve sâir harâir-i asliyâta idrâc edip ba‘dehû eşyâ-i memlûkesinden işbu dört aded beledî sandık ma‘a gılâf ve iki minder gılâfı ve bir beledî döşek ve bir sahan ve bir tencere ve bir kafesli leğen ma‘a ibrik ve bir baklava tepsisi ve bir tâbe ve bir sagīr kahve ibrik ve bir alaca kutnî kaftan ve sîm ön kuşak ve bir kilim ve bir yan kilimi ve bir yan keçesini bana hîbe ve teslîm ben dahi ittihâb ve kabûl etmekle ben sâir harâir-i asliyât gibi hürre ve eşyâ-i mezkûre emlâk-ı mevhûbem olmuş iken vasiyy-i mezbûr Mehmed Beşe bi-gayr-ı hakkın vaz‘-ı yed eder suâl olunsun dedikde gıbbe’s-suâl vasiyy-i mezbûr cevâbında mevsûfe-i mezbûre eşyâ-i muharrere-i mezkûreye ber-vech-i muharrer vaz‘-ı yedini ikrâr ve müdde‘iye-i mezbûrenin ber-vech-i mübeyyen müdde‘âsını inkâr edicek müdde‘iye-i mezbûreden sıdk-ı makāline beyyine taleb olundukda udûl-ı Müslimînden mahalle-i mezbûrede sâkin Mehmed Çelebi b. Mustafa ve Davudpaşa mahallesinde sâkin Hasan Çelebi b. Abdullah li-ecli’ş-şehâde meclis-i şer‘a hâzırân olup istişhâd olundukda fi’l-hakīka müteveffât-ı mezbûre fevtinden iki buçuk sene mukaddem işbu mevsûfe-i mezbûreyi mülkünde olduğu hâlde huzûrumuzda malından tahrîr ve i‘tâk ve silk-i harâire idrâc edip ba‘dehû eşyâ-i muharrere-i memlûkesini merkūme Gülbuy’a hîbe ve teslîm ol dahi kabz ve tesellüm etmekle mevsûfe-i mezbûre hürre ve eşyâ-i mezkûre emlâk-ı mevhûbesi olmuşdur biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm vâki‘ hâli mevlânâ-yı mezbûr mahallinde tahrîr ve ba‘dehû ma‘an mürsel Mehmed Beşe b. Hüseyin ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 27 min-Muharrem sene 1110 Şuhûdü’l-hâl: İbrahim Efendi b. Mehmed Hatîb, Mehmed Çelebi b. Osman, Ahmed Çelebi b. Yusuf, el-Hâc Ali b. Receb, Mahmud b. Ahmed.