Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 184 Hüküm no: 99 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin’in vakıf evinde oturan vakıf evladından İbrahim Odabaşı’nın evin tamiratına yaptığı masrafların tescil edildiği İbrahim <> Odabaşı’nın keşif hüccetidir. Mahmiye-i İstanbul’da Arabacı Bayezid mahallesinde sâkin iken bundan akdem vefât eden merhûm el-Hâc Hüseyin b. Ahmed’in işbu bin kırk altı senesi şehr-i Rebî‘ülâhiri’nin üçüncü günü târîhiyle müverraha mahmiye-i mezbûrede Davudpaşa Mahkemesi’nde nâibü’ş-şer‘i’ş-şerîf olan Ali Efendi b. Ahmed’in imzâ ve hatmiyle mümzât ve mahtûme vakfiye-i ma‘mûlün-bihâ mûcebince vakf-ı lâzım ile vakfı olup tasarrufunu evvelâ nefsine ba‘dehû evlâdına ve evlâd-ı evlâdına ve evlâd-ı evlâd-ı evlâdına şart eylediği zikri âtî menzilin evlâd-ı vâkıfdan meşrûtün-lehi bâ‘isü’l-kitâb İbrahim Odabaşı b. Mehmed meclis-i şer‘-i şerîf-i lâzımü’t-teşrîfde takrîr-i kelâm ve ta‘bîr ani’l-merâm edip ber-mûceb-i şart-ı vâkıf tasarrufu hâlâ bana meşrûta olup mahalle-i mezbûrede vâki‘ bir tarafdan Süleyman b. Abdullah mülküne ve bir tarafdan Za‘îmzâde denekle ma‘rûf Mustafa Ağa mülküne ve bir tarafdan Zeyneb Hatun mülküne ve bir tarafdan tarîk-i âmma müntehî menzil bi’l-külliye harâb oldukda cânib-i vakfda imâret ve meremmete kudret olmayıp vakf-ı mezbûrun mütevellîsi olan Hüseyin Çelebi b. Ali ma‘rifetiyle enkāzı tahmîn-i sahîh ile tahmîn ve takvîm olundukda sekiz bin akçeye bâliğ olup enkāz-ı mezkûreyi mütevellî-i merkūmdan yine sekiz bin akçeye iştirâ ve def‘-i semen ettiğimden sonra menzil-i mahdûd-ı mezkûra malım ile nefsim içün mülküm olmak üzere mütevellî-i merkūm izniyle binâ ve işhâd ve hâriciyede iki bâb oda ve bir sofa ve dehliz ve kenîf ve dâhiliyede iki bâb oda ve bir sofa ve bir kiler ve dehliz ve kenîf ve tahtında bir oda ve bir ahır binâ ve ihdâs etmekle kıbel-i şer‘den bâ-fermân-ı âlî üzerine varılıp masrûfumun mertebe-i tahammülü tahmîn-i sahîh ile keşf ve tahmîn olunması matlûbumdur dedikde kıbel-i şer‘den Mevlânâ Nuh Efendi b. Musa irsâl olunup ol dahi …? mimârlarından Mustafa Halîfe b. Abdullah ve İbrahim Halîfe b. Mustafa ve zeyl-i kitâbda [30a] isimleri mastûr emr-i binâ ve sukūfa vukūf ve şu‘ûru olan bî-garaz Müslimîn ile menzil-i mahdûd-ı mezkûrun üzerine varıp akd-i meclis-i şer‘-i şerîf ettikde mimârân-ı merkūmân ve mütevellî-i merkūm Hüseyin Çelebi hâzır iken evvelâ hâriciyede olan odayı misâha ettiklerinde tûlen on dört zirâ‘ ve arzen on dört zirâ‘ be-hesâb-ı terbî‘î iki yüz kırk dört zirâ‘ sakfın zirâ‘ı kırkar akçeden <> dokuz bin yedi yüz altmış akçe ve yine tûlen sekiz zirâ‘ ve arzen beş zirâ‘ be-hesâb-ı mezbûr kırk zirâ‘ altın şişeli tavanın zirâ‘ı sekizer akçeden üç bin iki yüz akçe ve Arabî kapaklı beş çift pencerenin her bir çiftini dörder yüz ellişer akçeden iki bin iki yüz elli akçe ve iki aded sandık dolabı üçer yüz akçeden altı yüz akçe ve on beş zirâ‘ gelip iki yüz akçe ve tûlen sekiz ve arzen beş zirâ‘ be-hesâb-ı merkūm kırk zirâ‘ ağa tahtasından ve döşemenin zirâ‘ı otuzar akçeden bin iki yüz akçe ve tûlen ve arzen be-hesâb-ı mezbûr yirmi zirâ‘ geçme ve mükemmel musandıranın zirâ‘ı yüzer akçeden iki bin akçe ve yine tûlen ve kadden be-hesâb-ı mezbûr elli iki zirâ‘ dolma duvar sıvasının zirâ‘ı kırkar akçeden iki bin seksen akçe ve mermer korluk(?) ma‘a ocak taşı ve koltuk ber-vech-i tahmîn bin yüz akçe ve bir altın nakışlı çift ber-vech-i tahmîn bin akçe ve sekiz aded çârçûbeli cam ber-vech-i tahmîn <> bin iki yüz akçe ve bu mahalde mala işi naşık ber-vech-i tahmîn beş yüz akçe ve yine tûl ve arzen be-hesâb-ı merkūm kırk iki zirâ‘ kahve odası tavanının zirâ‘ı kırkar akçeden bin altı yüz seksen akçe ve hesâb-ı merkūm üzere kırk iki ağa tahtasından döşemenin zirâ‘ı kırkar akçeden bin altı yüz seksen akçe be-hesâb-ı mezbûr üzere sac musandıra ber-vech-i tahmîn altı yüz akçe ve yine tûlen ve kadden be-hesâb-ı mezbûr on zirâ‘ dolma duvarın zirâ‘ı kırkar akçeden beş yüz yirmi akçe ve mahall-i merkūmede tûlen ve kadden be-hesâb-ı mezbûr yirmi sekiz zirâ‘ sıvanın zirâ‘ı kırkar akçeden bin yüz yirmi akçe ve ocak davlunbazı ma‘a ocak taşı ber-vech-i tahmîn altı yüz akçe ve mahallinde on zirâ‘ gelip yüz akçe ve iki dolab ber-vech-i tahmîn dört yüz seksen akçe ve üç aded cam ma‘a çârçûbe ber-vech-i tahmîn üç yüz akçeden dokuz yüz akçe ve ortalıkta iki aded pencere ma‘a cam ber-vech-i tahmîn dört yüz akçe ve Arabî kemer kapı ber-vech-i tahmîn iki yüz elli akçe ve yine hâriciyede şehnişîn altında dört aded destek seksener akçeden üç yüz yirmi akçe ve dört zirâ‘ tavan otuzar akçeden yüz yirmi akçe ve sokak kapısı üzerinde hesâb-ı merkūm üzere on zirâ‘ sakfın zirâ‘ı otuzar akçeden üç yüz akçe ve bu mahalde on zirâ‘ tavanın zirâ‘ı kırkar akçeden dört yüz akçe ve ceviz tahtasından Arabî kapı ma‘a çârçûbe ve kol demiri ve kilid ber-vech-i tahmîn iki bin akçe ve ıhlamurdan mükemmel orta kapı ber-vech-i tahmîn bin akçe ve dehlizde tûlen ve arzen be-hesâb-ı mezkûr kırk iki zirâ‘ tavanın zirâ‘ı kırk beşer akçeden bin sekiz yüz doksan akçe ve be-hesâb-ı merkūm üzere kırk iki zirâ‘ dehlizde ağa tahtasından döşemenin zirâ‘ı otuz beşer akçeden bin dört yüz yetmiş akçe ve bu mahalde nerdüban ma‘a Trabzon ve kepenk ber-vech-i tahmîn sekiz yüz akçe ve dolma duvar ma‘a ahır kapısı ber-vech-i tahmîn beş yüz akçe ve dâhiliyede vâki‘ odada tûlen sekiz zirâ‘ ve arzen dört buçuk zirâ‘ be-hesâb-ı mezbûr otuz dört zirâ‘ la‘l boyalı altın şişeli lamba pervâneli tavanın zirâ‘ı sekizer akçeden iki bin yedi yüz yirmi akçe ve oda-i merkūmede arzen beş zirâ‘ ve kadden dört buçuk zirâ‘ be-hesâb-ı merkūm yirmi iki buçuk zirâ‘ üstü kaplı musandıra ber-vech-i tahmîn iki bin akçe ve çıkrık işi parmaklı ve Arabî kapaklı altı aded pencere ber-vech-i tahmîn iki yüz yetmiş akçe ve on altı ziyâ camı yüzer akçeden bin altı yüz akçe ve camlar etrâfında mala işi nakış ber-vech-i tahmîn beş yüz akçe ve yine tûlen on zirâ‘ ve kadden beş zirâ‘ be-hesâb-ı merkūm elli zirâ‘ iki tarafı sıvalı dolma duvarın zirâ‘ı kırkar akçeden iki bin akçe ve Arabî kapaklı iki dolab ber-vech-i tahmîn altı yüz akçe ve oda-i merkūmede mermer korluk ve koltukları ve davlunbaz menîesiyle ber-vech-i tahmîn bin yüz akçe ve kiler içinde on zirâ‘ sıva ve bir cam dört yüz altmış akçe ve bir aded zevrak kapı ber-vech-i tahmîn üç yüz akçe ve hünkâr boyalı burma çift ber-vech-i tahmîn bin akçe ve on beş zirâ‘ tarakı nakışlı kilidi ber-vech-i tahmîn iki yüz yirmi beş akçe ve yine bu mahalde tûlen sekiz zirâ‘ ve arzen dört buçuk zirâ‘ be-hesâb-ı merkūm otuz altı zirâ‘ ağa tahtasından döşemenin zirâ‘ı otuz beşer akçeden bin iki yüz altmış akçe ve bir aded mükemmel doğrama kemer kapı ber-vech-i tahmîn iki yüz kırk akçe ve yine tûlen ve arzen be-hesâb-ı mezbûr kırk iki zirâ‘ ağa tahtasından dehliz döşemesinin zirâ‘ı otuzar akçeden bin iki yüz altmış akçe ve hesâb-ı merkūm üzere yirmi iki zirâ‘ aşı boyalı bel tahtasının zirâ‘ı yirmişer akçeden dört yüz akçe ve bir aded nerdüban ma‘a korkuluk ber-vech-i tahmîn bin akçe ve bir kenîf ma‘a döşeme ber-vech-i tahmîn iki bin akçe ve tahtânî odada tûlen ve kadden be-hesâb-ı merkūm elli iki buçuk zirâ‘ sıvalı dolma duvarın kırkar akçeden iki bin seksen dört akçe ve dört aded pencerenin her biri yüz ellişer akçeden altı yüz akçe be-hesâb-ı mezbûr otuz zirâ‘ tavanın zirâ‘ı yirmi beşer akçeden yedi yüz elli akçe ve bir sâde musandıra ve iki dolab ber-vech-i tahmîn sekiz yüz akçe ve üç aded sırça cam seksen akçe ve tahtânî nerdübanın hesâb-ı mezbûr üzere on zirâ‘ işbu boyalı koltuk perdesinin zirâ‘ı otuzar akçeden üç yüz akçe ve beş aded [30b] topaç direk ma‘a destek yüz yirmişerden altı yüz akçe ve tahtânîde bir bâb oda çatısı meremmâtı ber-vech-i tahmîn elli bin beş yüz akçe ve bahçede ...? tepesi aşı boyalı asma çardak ma‘a parmaklık ber-vech-i tahmîn iki bin dört yüz elli akçe ve dâhiliyede ve hâriciyede hesâb-ı merkūm üzere yüz kırk dört zirâ‘ kaldırımın zirâ‘ı on ikişer akçeden bin yedi yüz yirmi sekiz akçe ve yine bahçede tûlen ve kadden be-hesâb-ı merkūm iki yüz seksen üç zirâ‘ arşın duvarın zirâ‘ı altmışar akçeden on altı bin dokuz yüz seksen akçe min-haysü’l-mecmû‘ para üçer akçe hesâbı üzere doksan dört bin sekiz yüz yirmi üç akçe ile ancak olur bundan noksân ile olmak mümkün değildir deyü mimârân-ı mezbûrân ve sâir cemâ‘at-i Müslimînin icmâ‘ ve ittifâk ettiklerini mevlânâ-yı mezbûr mahallinde tahrîr ve ma‘an irsâl olunan Ahmed Çelebi b. Süleyman ve Mustafa b. Abdi ile meclis-i şer‘a gelip alâ-vukū‘ihi inhâ ve takrîr etmeğin mâ-hüve’l-vâki‘ kayd-şüd. Fî 22 min-Muharrem sene 1110 Şuhûdü’l-hâl: Yazıcı Mehmed Çelebi b. Ali, İmâm Osman Efendi b. İsmail, Müezzin Ahmed Efendi b. Mustafa, el-Hâc Hüseyin Ağa b. Veli, Mehmed Efendi b. Ali, İbrahim Ağa b. Mustafa, el-Hâc Mustafa [b.] Mehmed Beşe b. Mahmud bölük 32. Bölük, Ali Beşe b. Ahmed Beşe 10. Bölük, Osman Beşe b. Mehmed 10. Bölük, Dilsizzâde Mehmed Ağa b. Mustafa, İsmail Beşe b. Hasan 10. Bölük, Ali Beşe b. Mehmed.