Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 183 Hüküm no: 98 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Latif Hanım’ın varislerinden Ahmed Ağa’nın miras hakkını üvey babası Mehmed Ağa’dan teslim alıp zimmetini ibra ettikten sonra bir miktar borç aldığı Husûs-ı âti’l-beyânın mahallinde ketb ü tahrîri içün bi’l-iltimâs savb-ı şer‘-i enverden me’zûnen irsâl olunan Mevlânâ el-Hâc Abdurrahman Efendi b. Mustafa mahmiye-i İstanbul’da Altımermer kurbünde sâkin Ahmed Ağa b. Ali Ağa’nın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Davudpaşa mahallesinde sâkine iken bundan akdem vefât eden Latif Hatun bt. Abdullah’ın verâseti zevc-i metrûku Yunus Çelebi b. Halil’e ve mu‘takı olup <> fevt olan merhûm Hasan Ağa b. Abdullah’ın mu‘takı merhûm Ali Ağa’nın sulbî kebîr oğlu mezbûr Ahmed Ağa’ya münhasıra ve tashîh meselesi iki sehmden olmağla bir sehmi zevci mezbûr Yunus Çelebi’ye ve bâkī bir sehmi dahi usûbeten mezbûr Ahmed Ağa’ya isâbeti tahakkukundan sonra mezbûr Ahmed Ağa meclis-i ma‘kūd-ı mezkûrda mezbûr Ahmed Ağa’nın üvey babası bâ‘isü’l-kitâb es-Seyyid Mehmed Ağa b. Ali mahzarında ikrâr ve takrîr-i kelâm edip müteveffât-ı mezbûre Latif Hatun’un terekesinden tashîh-i mezbûr üzere bir sehmi zevci mezbûr Yunus Çelebi’den ve sâir terekesine vaz‘-ı yed edenlerden da‘vâ ve talebe ve ahz u kabza ve bana îsâle ve ahz u kabz ve îsâl mütevakkıf olduğu umûrun cümlesine tarafımdan üvey babam mezbûr es-Seyyid Mehmed Ağa’yı huzûr-ı Müslimînde vekîl ve nâib-i menâb nasb ü ta‘yîn etmiş idim el-hâletü hâzihi defter-i kassâm-ı askerî nâtık olduğu üzere merkūm es-Seyyid Mehmed Ağa’nın bi’l-vekâle kabz eylediği para dört akçe hesâbı üzere kırk bin dört yüz on dokuz akçeyi vâris cihetinden dahi mezbûr es-Seyyid Mehmed Ağa’nın kabz eylediği be-hesâb-ı mezbûr yedi bin sekiz yüz on yedi akçe ki cem‘an kırk sekiz bin iki yüz otuz altı akçe hakkımı üvey babam mezbûr es-Seyyid Mehmed Ağa bana işbu meclisde tamâmen def‘ u teslîm ben dahi mezbûr Seyyid Mehmed Ağa yedinden bi’t-tamâm alıp kabz eyledim meblağ-ı mecmû‘-ı mezbûrdan mezbûr Seyyid Mehmed Ağa yedinde ve zimmetinde bir akçe ve bir habbe hakkım bâkī kalmayıp tereke-i müteveffât-ı mezbûreden hisseme isâbet eden cemî‘ mîrâs da‘vâsından üvey babam mezbûr Seyyid Mehmed Ağa’nın ve vâlidem işbu Hadîce Hatun bt. Abdullah’ın zimmetlerini ibrâ-i âmm-ı kâtı‘u’n-nizâ‘la ibrâ ve iskāt eyledim dedikde gıbbe’t-tasdîk merkūm Ahmed Ağa yine meclis-i ma‘kūd-ı mezbûrda merkūm es-Seyyid Mehmed Ağa mahzarında ikrâr ve takrîr-i kelâm edip merkūm es-Seyyid Mehmed Ağa’nın yedinde olan işbu müfredât defteri nâtık olduğu üzere benim emrimle kendi malından beynimizde ma‘lûm ba‘zı mesârifim içün bi-şartı’r-rücû‘ yüz seksen üç guruş harc ü sarf etmekle meblağ-ı mezbûr zimmetimde üvey babam mezbûr Seyyid Mehmed Ağa’ya vâcibü’l-edâ ve lâzımü’l-kazâ deynim vardır deyü bi-tav‘ihî ikrâr u i‘tirâf etmeğin ikrârı mûcebince ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Hasan Çelebi b. Abdullah ve Mehmed b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 3 min-Muharrem sene 1110 Şuhûdü’l-hâl: İbrahim Efendi b. Osman, Mustafa Bey b. Abdullah, Hoca Mustafa Efendi [b.] Mehmed, Yunus Çelebi b. Halil, Hasan Çelebi b. Halil, Mehmed Ağa b. Mustafa, el-Hâc Mustafa b. Abdullah, Mehmed Bey b. Mustafa, Mehmed Bey b. Cafer Bostânî