Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 190 Hüküm no: 104 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffaf Mehmed’in yetimleri babalarının ve kardeşlerinin miras hisselerini vasileri Yusuf Odabaşı’ndan sulh yoluyla aldıkları Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen irsâl olunan Hidayetullah Efendi b. Yakub mahmiye-i İstanbul’da Hoca Hayreddin mahallesinde sâkin iken bundan akdem vefât eden Haffâf el-Hâc Mehmed b. Veli’nin menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun kızı ve sin ve cüssesinin bülûğ ve rüşde tahammülü ve bülûğ ve rüşdüne mu‘terife olup zâtı mahalle-i mezbûre ahâlîsinden Mehmed Bey b. Hızır ve Attâr İbrahim Çelebi b. Yakub ta‘rîfleriyle mu‘arrefe olan Ümmügülsüm nâm bikr-i bâliğa ve oğlu ve sin ve cüssesinin bülûğ ve rüşde tahammülü ve bülûğ ve rüşdüne mu‘terif olup Süleyman nâm şâbb-ı emred meclis-i ma‘kūd-ı mezkûrda hâl-i sıgārlarında vasiyy-i mansûbları ve li-ebeveyn ammileri hâfızü’l-kitâb Yusuf Odabaşı b. el-mezbûr Veli mahzarında her biri ikrâr [ve] takrîr-i kelâm edip babamız müteveffâ-yı mezbûrdan ve ba‘dehû müte‘âkiben vefât eden karındaşlarımız Fâtıma ve Rukiye ve Mehmed’den mezbûr Yusuf Odabaşı yedinde olan kassâm defteri mûcebince ba‘de ihrâci’l-mesârif para üç akçe hesâbı üzere makbûzu olan elli sekiz bin dört yüz elli yedi akçenin yevmî on dörder akçeden bin yüz Muharremi gurresinden bin yüz on Muharremi gāyetine gelince yüz yirmi ayda elli bin dört yüz akçesini nafaka ve kisvelerimize harc ü sarf edip meblağ-ı bâkī sekiz bin elli yedi akçeyi dahi vasiyy-i mezbûr yedinden bi’d-defa‘ât alıp kabz eyledik lâkin mezbûr Yusuf Odabaşı zikr olunan elli sekiz bin dört yüz elli yedi akçeyi i‘mâl ve hâsıl olan nemâsını mezbûr Yusuf Odabaşı’dan da‘vâ ettiğimizde ol dahi i‘mâl etmedim asıl maldan infâk eyledim dedikde beynimize muslihûn tavassut edip fedâen li’l-yemîn sekiz guruş bana ve yüz guruş kız karındaşım mezbûre Ümmügülsüm’e vermek üzere mezbûr Yusuf Odabaşı ile sulh olup bedel-i sulh olan meblağ-ı mezbûru yedinden her birimiz alıp kabz eyledik ba‘de’l-yevm mezbûr Yusuf Odabaşı’nın mesârifine zikr olunan müteveffâların terekelerinden hissemize isâbet eden cemî‘ mîrâs da‘vâsından mezbûr Yusuf Odabaşı’nın zimmetini ibrâ-i âmm-ı kâtı‘u’n-nizâ‘la ibrâ ve iskāt eyledik dediklerinde gıbbe’t-tasdîkı’ş-şer‘î vâki‘ hâli tahrîr ba‘dehû ma‘an mürsel Ahmed Çelebi b. Süleyman ve Mehmed Bey b. Yakub ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 5 Safer sene 1110 Şuhûdü’l-hâl: İsmail Ağa b. Mehmed, Ali Bey b. Hasan, Mehmed Bey b. Hızır, el-Hâc Ali b. Veli, Ahmed Çelebi b. Mustafa ve gayruhum.