Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 191 Hüküm no: 105 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Reis’in varisleri Hüseyin ve Ayşe Hatun’un terekedeki hisseleri ve mehir bedelini Mahmud Reis’in vasisi Ahmed Beşe’den aldıkları Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen ba‘s olunan Mevlânâ İbâdzâde es-Seyyid Abdullah Efendi b. es-Seyyid Mustafa Efendi mahmiye-i İstanbul’da Esir Hanı kurbünde Küçük Sipâhi Hanı’nda Ahmed Beşe b. Kaya’nın sâkin olduğu odaya varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde fi’l-asl Vilâyet-i Anadolu’da Trabzon sancağında [32a] Arhavi? kazâsına tâbi‘ Kini nâm karyeden olup mahrûse-i Galata muzâfâtından kasaba-i Tophane’de Firuz Ağa mahallesinde sâkin iken bundan akdem vefât eden Mahmud Reis b. el-Hâc Ömer’in verâseti zevce-i menkûha-i metrûkesi Âişe Hatun bt. Abdullah’a ve vâlidesi olup karye-i mezbûrede sâkine Âişe Hatun bt. el-Hâc Ömer’e ve li-ebeveyn karındaşı Hüseyin Reis’e münhasıra oldukdan sonra mezbûr Hüseyin Reis meclis-i ma‘kūd-ı mezbûrda müteveffâ-yı mezbûrun bâ-hüccet-i şer‘iyye tesviye-i umûruna vasiyy-i muhtârı olmağla terekesine vaz‘-ı yed eden işbu bâ‘isü’l-kitâb merkūm Ahmed Beşe b. Kaya mahzarında ikrâr ve takrîr-i kelâm edip kız karındaşım müteveffâ-yı mezbûr terekesinden ve evvelâ vefât eden babam el-Hâc Ömer’in terekesinden ber-mûceb-i defter-i kassâm-ı askerî hisseme isâbet eden para üç akçe hesâbınca bir kere yüz bin ve elli bin yüz yetmiş beş akçeyi vasiyy-i mezbûr bana def‘ u teslîm ben dahi yedinden bi’t-tamâm alıp kabz eyledim aslâ vasiyy-i mezbûr zimmetinde bir akçe hakkım kalmayıp husûs-ı mezkûra ve sâir[e] müte‘allık âmme-i da‘vâdan vasiyy-i mezbûrun zimmetini ibrâ ve iskāt eyledim dedikde gıbbe’t-tasdîk müteveffâ-yı mezbûr Mahmud’un zevce-i menkûhası mezbûre Âişe Hatun tarafından husûs-ı âti’l-beyânda vekîl olduğu yedinde olan hüccet-i şer‘iyye ile sâbit olan el-Hâc İsmail Ağa b. Ahmed meclis-i ma‘kūd-ı mezbûrda vasiyy-i mezbûr mahzarında bi’l-vekâle ikrâr ve takrîr-i kelâm edip müvekkilem mezbûrenin zevci müteveffâ-yı mezbûr zimmetinde mütekarrir ve ma‘kūdun-aleyh olan para üç akçe hesâbınca on beş bin akçe mehr-i müeccel hakkını ve ber-mûceb-i defter-i kassâm-ı askerî rub‘ hissesine isâbet eden on dokuz bin üç yüz elli beş akçeyi vasiyy-i mezbûr Ahmed Beşe yedinden bi’l-vekâle tamâmen alıp kabz edip husûs-ı mezkûra ve sâire müte‘allıka âmme-i da‘vâdan vasiyy-i mezbûrun zimmetini bi’l-vekâle ibrâ-i âm ile ibrâ eyledik dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel İbrahim Çelebi b. Mehmed ve Yahya b. İsmail ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 5 Zilhicce sene 1109 Şuhûdü’l-hâl: el-Hâc Osman b. Hasan, Osman b. Abdullah. Mehmed Çelebi b. Davud, İbrahim Beşe b. Ahmed, Ömer Bey b. Eyüb, Ahmed Çelebi b. Süleyman.