Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 193 Hüküm no: 107 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mahmud Reis’in gemisinde mellah olan Kara Ali, Mustafa, Mehmed Beşe ve Ali’nin mellahlık ücretinden olan alacaklarının terekeden ödenmesi Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘-i enverden me’zûnen ba‘s olunan Mevlânâ İbâdzâde es-Seyyid Abdullah Efendi b. el-merhûm es-Seyyid Mustafa Efendi mahmiye-i [İ]stanbul’da Esir Hanı kurbünde Küçük Sipâhi Hanı’nda Ahmed Beşe b. Kaya’nın sâkin olduğu odaya varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde fi’l-asl Vilâyet-i Anadolu’da Trabzon sancağında Arhavi? kazâsına tâbi‘ Kise nâm karyeden olup mahrûse-i Galata müzâfâtından kasaba-i Tophane’de Firuz Ağa mahallesinde sâkin iken bundan akdem vefât eden Mahmud Reis b. el-Hâc Ömer’in verâseti zevce-i menkûha-i metrûkesi [32b] Âişe Hatun bt. Abdullah’a ve vâlidesi olup karye-i mezbûrede sâkine Âişe Hatun bt. el-Hâc Ömer’e ve li-ebeveyn karındaşı olup kezâlik karye-i mezbûrede sâkin Hüseyin Reis’e münhasıra oldukdan sonra müteveffâ-yı mezbûrun sefînesinde ücret ile mellâh olan Kara Ali b. Feridun meclis-i ma‘kūd-ı mezbûrda müteveffâ-yı mezbûrun bâ-hüccet-i şer‘iyye vasiyy-i muhtârı olmağla terekesine vaz‘-ı yed eden merkūm Ahmed Beşe mahzarında üzerine da‘vâ ve takrîr-i kelâm edip müteveffâ-yı mezbûr Mahmud Reis b. el-Hâc Ömer zimmetinde mellâhlık ücretinden ba‘de külli’l-hesâb yirmi dokuz buçuk guruş hakkım olup hattâ hâl-i kemâl-i sıhhatinde cihet-i mezkûreden ol kadar guruş zimmetinde bana lâzımü’l-edâ deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla yed-i vasîde olan terekesinden taleb ederim suâl olunsun dedikde yine müteveffâ-yı mezbûrun sefînesinde mellâh olan Ali b. Ahmed vasiyy-i mezbûr muvâcehesinde üzerine da‘vâ ve takrîr-i kelâm edip müteveffâ-yı mezbûrun zimmetinde mellâhlık ücretinden ba‘de külli’l-hesâb yirmi altı buçuk guruş hakkım olup hattâ hâl-i kemâl-i sıhhatinde cihet-i mezkûreden ol kadar guruş lâzımü’l-edâ deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla yed-i vasîde olan terekesinden taleb ederim suâl olunsun dedikde yine müteveffâ-yı mezbûrun sefînesinde mellâh olan Mustafa b. Osman vasiyy-i mezbûr muvâcehesinde üzerine da‘vâ ve takrîr-i kelâm edip müteveffâ-yı mezbûrun zimmetinde mellâhlık ücretinden ba‘de külli’l-hesâb on altı guruş ve bir sülüs guruş hakkım olup hattâ hâl-i kemâl-i sıhhatinde cihet-i mezkûreden ol kadar guruş zimmetinde bana lâzımü’l-edâ deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla yed-i vasîde olan terekesinden taleb ederim suâl olunsun dedikde yine müteveffâ-yı mezbûrun sefînesinde mellâh olan Mehmed Beşe b. Abdüllatif vasiyy-i mezbûr muvâcehesinde üzerine da‘vâ ve takrîr-i kelâm edip müteveffâ-yı mezbûr Mahmud Reis b. el-Hâc Ömer zimmetinde mellâhlık ücretinden ba‘de külli’l-hesâb üç buçuk guruş hakkım olup hattâ hâl-i kemâl-i sıhhatinde cihet-i mezkûreden ol kadar guruş bana zimmetinde lâzımü’l-edâ deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla yed-i vasîde olan terekesinden taleb ederim suâl olunsun dedikde yine müteveffâ-yı mezbûrun sefînesinde mellâh olan Mustafa b. İsmail vasiyy-i mezbûr muvâcehesinde üzerine da‘vâ ve takrîr-i kelâm edip müteveffâ-yı mezbûrun zimmetinde mellâhlık ücretinden ba‘de külli’l-hesâb beş guruş hakkım olup hattâ hâl-i kemâl-i sıhhatinde cihet-i mezkûreden bana lâzımü’l-edâ deyni olduğunu huzûr-ı Müslimînde ikrâr ve işhâd dahi edip kable’l-edâ fevt olmağla yed-i vasîde olan terekesinden taleb ederim suâl olunsun dedikde gıbbe’s-suâl ve’l-inkâr müdde‘iyyûn-ı mezbûrûndan sıdk-ı makāllerine beyyine taleb olundukda udûl-ı ahrâr-ı ricâl-i Müslimînden han-ı mezkûrede sâkin Ahmed Beşe b. Abdüllatif ve Mehmed Beşe b. Mustafa li-ecli’ş-şehâde meclis-i ma‘kūd-ı mezbûra hâzırân olup istişhâd olundukda fi’l-hakīka müteveffâ-yı mezbûr Mahmud Reis b. el-Hâc Ömer hâl-i kemâl-i sıhhatinde ber-vech-i mübeyyen işbu müdde‘iyyûn-ı mezbûrûna mellâh ücretinden ba‘de külli’l-hesâb cem‘an seksen buçuk guruş zimmetinde lâzımü’l-edâ deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın müdde‘iyyûn-ı mezbûrûndan her biri ber-vech-i şer‘î üzere tahlîf olunmağın mûcebiyle ba‘de’l-hükm vâki‘ hâli kezâlik inhâ ve takrîr etmeğin mâ-vaka‘a kayd-şüd. Fî gurre-i Ramazan sene 1109 Şuhûdü’l-hâl: Es-sâbikūn es-sâbikūn.