Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 192 Hüküm no: 106 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mahmud Reis’in Ahmed Beşe’ye olan borcunun terekesinden ödenmesi Kezâlik akd-i meclis-i şer‘-i şerîf ettikde fi’l-asl Vilâyet-i Anadolu’da Trabzon sancağında Arhavi? kazâsına tâbi‘ Kini nâm karyeden olup mahrûse-i Galata muzâfâtından kasaba-i Tophane’de Firuz Ağa mahallesinde sâkin iken bundan akdem vefât eden Mahmud Reis b. el-Hâc Ömer’in verâseti zevce-i menkûha-i metrûkesi Âişe Hatun bt. Abdullah’a ve vâlidesi olup karye-i mezbûrede sâkine Âişe Hatun bt. Ömer’e ve li-ebeveyn karındaşı olup kezâlik karye-i mezbûrede sâkin Hüseyin Reis nâm kimesneye münhasıra oldukdan sonra işbu bâ‘isü’l-kitâb Ahmed Beşe meclis-i ma‘kūd-ı mezbûrda müteveffâ-yı mezbûrun zevcesi ve terekesine vâzı‘atü’l-yed olan mezbûre Âişe Hatun bt. Abdullah tarafından husûs-ı âti’l-beyânda husûmet ve redd-i cevâba vekîl olduğu zât-ı mezbûreyi ma‘rifet-i şer‘iyye ile ârifân Mehmed Çelebi b. Mustafa ve Ahmed Beşe b. Abdüllatif şehâdetleriyle mahzar-ı hasm-ı câhidde sâbit ve sübût-ı vekâletine hükmolunan el-Hâc İsmail Ağa b. Ahmed mahzarında üzerine da‘vâ ve takrîr-i kelâm edip müteveffâ-yı mezbûr Mahmud Reis [b.] el-Hâc Ömer zimmetinde cihet-i karz-ı şer‘îden üç yüz yirmi sekiz buçuk guruş hakkım olup hattâ hâl-i kemâl-i sıhhatinde zikr olunan Firuz Ağa mahallesinde sâkin olduğu menzilinde ikrâr ve işhâd dahi edip kable’l-edâ fevt olmağla terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûr Ahmed Beşe’den sıdk-ı makāline beyyine taleb olundukda udûl-ı ahrâr-ı ricâl-i Müslimînden mahalle-i mezkûrda sâkin el-Hâc Osman b. Hasan ve Osman Çelebi b. Abdullah li-ecli’ş-şehâde meclis-i ma‘kūd-ı mezbûra hâzırân olup istişhâd olundukda fi’l-hakīka müteveffâ-yı mezbûr Mahmud Çelebi b. el-Hâc Ömer hâl-i kemâl-i sıhhatinde mârrü’z-zikr sâkin olduğu menzilinde işbu müdde‘î-i mezbûr Ahmed Beşe b. Kaya’ya cihet-i mezkûreden üç yüz yirmi sekiz buçuk guruş deynim vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîf mûcebiyle ba‘de’l-hükm vâki‘ hâli kezâlik inhâ etmeğin mâ-vaka‘a kayd-şüd. Fî gurre-i Ramazani’l-mübârek sene 1109 Şuhûdü’l-hâl: Es-sâbikūn es-sâbikūn es-sâbikūn.