Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 200 Hüküm no: 114 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şaban Çelebi vefat eden Duacızade Abdullah Efendi’nin vasisi olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ es-Seyyid Abdullah Efendi b. İbrahim mahmiye-i İstanbul’da Emîr Buhârî Tekyesi’nde hâlâ Nakşibendiye şeyhi olan umdetü’l-meşâyihi’l-kirâm es-Seyyid Fazlullah Efendi’nin menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Hoca Üveys mahallesinde sâkin iken bundan akdem vefât eden Du‘âcızâde Abdullah Efendi b. Mustafa b. Himmet’in tesviye-i umûruna ve sagīre kızı Âişe’nin mal-ı müntakilini vakt-i rüşd ü sedâdına varınca hıfza vasiyy-i muhtârı olduğunu iddi‘â eden mahalle-i mezkûrede sâkin bâ‘isü’l-kitâb Şa‘bân Çelebi b. Mehmed meclis-i ma‘kūd-ı mezbûrda müteveffâ-yı mezbûrun li-ebeveyn ammi oğlu İsmail b. Osman mahzarında üzerine da‘vâ ve takrîr-i kelâm edip müteveffâ-yı mezbûr fevtinden yirmi gün mukaddem hasta ve alîl olduğu hâlde bi-emrillâhi te‘âlâ rıhlet eylediğimden sonra tesviye-i umûruna ve sagīre kızı Âişe’nin mal-ı müntakilini vakt-i rüşd ve sedâdına varınca zabt ve hıfza huzûr-ı Müslimînde beni vasiyy-i muhtâr nasb ve ihtiyâr ettikde ben dahi muvâcehesinde kabûl ve musırran-aleyhâ fevt oldukda sagīre-i mezbûrenin mal-ı müntakilini zabt ve hıfza mezbûr İsmail b. Osman mâni‘ olur suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı Müslimînden mûmâ-ileyh eş-Şeyh es-Seyyid Fazlullah Efendi <> b. Abdullah ve Akşemseddin [mahallesinde] sâkin Osman Efendi b. Şa‘bân li-ecli’ş-şehâde meclis-i ma‘kūd-ı mezkûra hâzırân olup istişhâd olundukda fi’l-hakīka müteveffâ-yı mezbûr Du‘âcızâde Abdullah Efendi b. Mustafa b. Himmet fevtinden yirmi gün mukaddem tesviye-i umûruna ve sagīre-i mezbûrenin mal-ı müntakilini zabt ve hıfza vasiyy-i muhtâr nasb ü ta‘yîn ettikde ol dahi muvâcehesinde kabûl ve musırran-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ve ma‘an ba‘s olunan Hasan Çelebi b. Abdullah ile meclis-i şer‘a gelip alâ-vukū‘ihi inhâ ve takrîr etmeğin mâ-vak‘a kayd-şüd. Fî 19 Muharrem sene 1110 Şuhûdü’l-hâl: es-Seyyid Halil Efendi b. Muslu, es-Seyyid Ahmed Efendi b. Ali, Rûşenî Efendi, Abdullah Efendi b. Abdülbaki el-İmâm.