Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 199 Hüküm no: 113 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eskici Hacı Ahmed’in vasisi olduğu müteveffa Eskici Yusuf Beşe’ye olan borcunu ödediğini ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın savb-ı şer‘den me’zûnen irsâl olunan Mevlânâ es-Seyyid Abdülmuti Efendi mahmiye-i İstanbul’da Mollagürânî mahallesinde sâkin umdetü’l-emâcid ve’l-a‘yân Muhzır el-Hâc Mehmed Ağa b. el-merhûm Cafer Ağa’nın menzillerine varıp zeyl-i kitâbda muharrerü’l-esâmî udûl-ı Müslimîn huzûrunda akd-i meclis-i şer‘-i şerîf eyledikde mahmiye-i mezbûrede Kocamustafapaşa mahallesi sükkânından olup bundan akdem Vilâyet-i Rumeli’de İsmailgeçidi kasabasında vefât eden Eskici Yusuf Beşe b. Ebulkasım’ın terekesini veresesine îsâle vasiyy-i muhtârı olan Eskici el-Hâc Ahmed b. Osman meclis-i ma‘kūd-ı mezbûrda mezbûr Yusuf Beşe’den sonra vefât eden li-ümmin karındaşı el-Hâc Hamza Ağa b. Mehmed b. Abdullah’ın evlâd-ı sıgārı Abdurrahman ve Hadîce’nin vasiyy-i mansûbları olmağla terekesine vaz‘-ı yed eden Ahmed Ağa b. Cafer Ağa mahzarında üzerine da‘vâ ve takrîr-i kelâm edip bundan akdem vesâyetim <> hasebiyle mezbûr Yusuf Beşe’nin terekesinden kabza mezbûre kassâm defteri mûcebince makbûzum olan üç yüz altmış guruşu veresesine îsâl içün Hüseyin ve Ahmed nâm kimesnelerin yediyle mezbûr el-Hâc Hamza Ağa b. Mehmed b. Abdullah’a def‘ u teslîm ol dahi kabz ve kendi malına halt ve şuhûd mahzarında ikrâr ve işhâd ettiğinden sonra meblağ-ı mezbûrun bir def‘a elli yedi buçuk cem‘an yüz yedi buçuk guruşu vereseye îsâl ve teslîm ve bâkī iki yüz elli iki buçuk guruş zimmetinde iken vefât etmeğin hâlâ verese-i merkūmûna îsâl ve teslîm içün meblağ-ı bâkī-i mezbûru terekesinden taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline muvâfık beyyine taleb olundukda mezbûr Hamza Ağa’nın sulbî kebîr oğlu Ahmed Çelebi ve etbâ‘ından diğer Hüseyin b. Hasan li-ecli’ş-şehâde meclis-i mezbûra hâzırân olup istişhâd olunduklarında fi’l-vâki‘ müteveffâ-yı mezbûr el-Hâc Hamza Ağa b. Mehmed b. Abdullah hayâtında li-ümmin karındaşım olan müteveffâ-yı mezbûr Yusuf Beşe b. Ebulkasım’ın terekesinden kasaba-i mezbûre kassâmı defteri mûcebince vasiyy-i muhtârı mezbûr Eskici el-Hâc Ahmed’in makbûzu olan meblağ-ı mezbûr üç yüz altmış guruşu veresesine îsâl içün Hüseyin ve Ahmed yediyle mezbûr el-Hâc Ahmed’den ben ahz u kabz ve kendi malımla halt eyledim deyü bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfi’ş-şer‘î mûcebince ba‘de’l-hükm müteveffâ-yı mezbûr Yusuf Beşe’nin verâseti zevce-i metrûkesi Fâtıma Hatun bt. Mahmud’a ve kebîre kızı Emetullah ve sagīr oğlu Mehmed’e münhasıra olduğu mütehakkik oldukdan sonra zâtları Ahmed Beşe b. Osman ve Mustafa Çelebi b. Zülfikâr ta‘rîfleriyle mu‘arrefetân olan mezbûre Emetullah Hatun asâleten ve sagīr-i <>mezbûrun vâlidesi ve vasiyy-i mansûbesi olan mezbûre Fâtıma Hatun asâleten ve vesâyeten meclis-i şer‘-i şerîfde işbu bâ‘isü’l-kitâb vasiyy-i merkūm Ahmed Ağa mahzarında mezbûr Eskici Ahmed Beşe hâzır iken her biri ikrâr ve takrîr-i kelâm edip mezbûr el-Hâc Hamza Ağa hayâtında ber-vech-i meşrûh makbûzu olan üç yüz altmış guruşun mukaddemâ ber-vech-i muharrer yüz yedi buçuk guruşun elli guruşu bize ve elli yedi buçuk guruşu ma‘rifetimizle müteveffâ-yı mezbûr Yusuf Beşe’nin mahalle avârızı vakfına deyn-i müsbet içün mütevellî-i vakfa edâ ve teslîm olunmağla vech-i mezkûr üzere iki yüz elli iki buçuk guruş bâkī kalmağın hâlâ vasiyy-i mezbûr Ahmed Ağa meblağ-ı bâkī iki yüz elli iki buçuk guruşu Hamza Ağa’nın terekesinden mezbûr el-Hâc Ahmed yediyle işbu meclis-i şer‘de bize edâ ve teslîm biz dahi bi’t-tamâm ahz u kabz eyledik min-ba‘d mezbûr el-Hâc Ahmed’in medfû‘u olan meblağ-ı mezbûr üç yüz altmış guruşdan mezbûr el-Hâc Hamza Ağa zimmetinde bir akçe ve bir habbe bâkī kalmamışdır dediklerinde mezbûr el-Hâc Ahmed dahi mezbûretânı tasdîk ve merkūm Ahmed Ağa tahkīk etmeğin mâ-vaka‘a ba‘de’l-inhâ bi’t-taleb ketb olundu. Fî 20 mine’l-Muharremi’l-harâm sene 1110 Şuhûdü’l-hâl: Ömer Ağa b. Hızır Ağa, Çukadâr el-Hâc Süleyman Beşe b. Selim, Müezzin Mehmed Çelebi b. Mahmud, Veli Bey b. Hasan, el-Hâc Bektaş Ağa b. Abdi, Halil Beşe b. İbrahim, Mustafa Beşe b. Zülfikâr, Hüseyin Çelebi b. Mehmed, Çukadâr el-Hâc Abdullah b. Mehmed ve gayruhum.