Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 203 Hüküm no: 116 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun vefat eden Saime Hatun’un kendisini vasi tayin ettiğini ispat ettiği Mahmiye-i İstanbul’da el-Hâc Hasan mahallesinde sâkine iken bundan akdem vefât eden Saime Hatun bt. Mehmed b. Abdullah’ın verâseti kebîr oğlu olup kendinden mukaddem [vefât] eden Attâr el-Hâc Mustafa b. Mahmud’un sulbiye sagīre kızları Hadîce ve Emine ve Safiye’ye münhasıra olduğu şer‘an zâhir olduktan sonra müteveffât-ı mezbûrenin li-ebeveyn kız karındaşı kızı olup vech-i âtî üzere vesâyetini tenfîze vasiye-i muhtâresi olduğunu iddi‘â edip zâtı ta‘rîf-i şer‘î ile mu‘arrefe olan mahalle-i mezbûrede sâkine bâ‘isetü’l-kitâb Emine Hatun bt. Ahmed meclis-i şer‘-i şerîf-i enverde zikr olunan sagīrelerin tesviye-i emrlerine min-kıbeli’ş-şer‘ vasî nasb olunan İbrahim Çelebi b. Mustafa mahzarında üzerine da‘vâ ve takrîr-i kelâm edip müteveffât-ı mezbûre Saime Hatun bt. Mehmed b. Abdullah fevtinden dört gün mukadem bi-emrillâhi te‘âlâ fevt olduğumda vech-i mesnûn üzere levâzım-ı techîz ve tekfînim görüldükden sonra bâkī kalan cemî‘ terekemin sülüsü ifrâz olunup sülüs-i mezbûrdan iki yüz guruşuyla iskāt-ı salâtım ve eyyâm-ı mu‘tâde[de] tabh-ı ta‘âm ve it‘âm-ı fukarâ oluna ve üç yüz elli guruşu menâsik-i hacc-ı şerîfe âzim bir recül-i sâlihe verilip benim içün hacc-ı şerîf ettirile ve beş yüz guruş benim içün sen ahz eyleyesin ve yüz elli guruş ile merhûm Şerifezâde Mehmed Efendi Dârü’l-hadîsi’nin ta‘mîr ve termîme muhtâc olan mevâzi‘i ta‘mîr oluna ve kıymet-i misli ile bir câriye-i Müslime iştirâ olunup keffâret-i savm ve yemînim içün i‘tâk oluna ve hizmetimde olan Ferruh ve Dâye ve Rahime hatunlara birer kat esâs-ı beyt alıverile ve fazla kalırsa vücûh-ı birr ü hayra sarf oluna deyü huzûr-ı Müslimînde vasiyet ve vesâyâ-yı mezkûrenin tenfîzine beni vasiye-i muhtâre nasb ü ta‘yîn edip ben dahi muvâcehesinde ba‘de’l-kabûl musırraten-aleyhâ fevt olup tenfîz-i vesâyâ murâd ettiğimde vasiyy-i mezbûr İbrahim Çelebi mâni‘ olur suâl olunsun dedikde gıbbe’s-suâl ve’l-inkâr müdde‘iye-i mezbûre Emine Hatun’dan müdde‘âsına mutâbıka beyyine taleb olundukda udûl-ı Müslimînden olup mahalle-i mezbûre ahâlîsinden zât-ı müteveffât-ı mezbûreyi ma‘rifet-i şer‘iyye ile ârifân eş-Şeyh Abdullah Efendi b. Müstakim Efendi ve Abdurrahman Çelebi b. Mustafa Efendi li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka zâtı rü’yetimiz ve ma‘rifet-i şer‘iyye ile ma‘lûmumuz olan müteveffât-ı mezbûre Saime Hatun bt. Mehmed b. Abdullah fevtinden dört gün mukaddem bi-emrillâhi te‘âlâ fevt olduğumda levâzım-ı techîz ve tekfînim görüldükten sonra bâkī kalan cemî‘ terekemin sülüsü ifrâz olunup vech-i meşrûh üzere kezâlik vücûh-ı birr ü hayra sarf oluna deyü huzûrumuzda vasiyet ve vesâyâ-yı mezkûrenin tenfîzine işbu müdde‘iye-i mezbûre Emine Hatun bt. Ahmed’i vasiye-i muhtâre nasb ü ta‘yîn edip ol dahi muvâcehesinde ba‘de’l-kabûl musırraten-aleyhâ vefât eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm kayd-şüd. Fî 2 Safer sene 1110 Şuhûdü’l-hâl: Mehmed Efendi b. Mahmud, İbrahim Efendi b. Receb el-Müezzin, Mustafa Efendi b. Abdullah, Ahmed Çelebi b. Müstakim, Mehmed Çelebi b. Mehmed, Mehmed Çelebi b. Hızır, Hasan Çelebi b. Hüseyin, Hasan Çelebi b. Abdullah, Süleyman Çelebi b. Ahmed.