Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 209 Hüküm no: 119 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Hasan’ın çocukları ile hizmetçilerine nafaka takdir edildiği Mahmiye-i İstanbul’da el-Hâc Hasan mahallesi ahâlîsinden iken bundan akdem vefât eden Na‘lıncızâde denmekle şehîr Attâr el-Hâc Mustafa b. Mahmud’un sulbiye sagīre kızları Hadîce ve Emine ve Safiye’nin min-kıbeli’ş-şer‘ tesviye-i emrlerine vasiyy-i mansûbları Attâr İbrahim Çelebi b. Mustafa meclis-i şer‘-i şerîf-i enverde bi’l-vesâye takrîr-i kelâm edip vasîleri olduğum zikr olunan sagīreler bir nefer hâdimeleriyle nafakaya eşedd-i ihtiyâcları olmağla babaları müteveffâ-yı mezbûrdan müntakil mallarından her birine hâdimesiyle nafakaları içün kıbel-i şer‘den kadr-ı kifâye meblağ farz ve takdîr olunmak matlûbumdur dedikde vasiyy-i mezbûrun kelimât-ı meşrûhası vâkı‘a mutâbıka olduğu zeyl-i kitâbda mektûbü’l-esâmî Müslimîn haberleriyle lede’ş-şer‘i’ş-şerîf zâhir ve mukarrer olmağın hâkim-i muvakkı‘-i sadr-ı kitâb efendi hazretleri zikr olunan sagīrelere ve bir nefer hâdimeleriyle her birine babaları müteveffâ-yı mezbûrdan müntakil mallarından târîh-i kitâbdan yevmî kırkar sağ akçe ancak nafakalari’çün farz ve takdîr buyurup meblağ-ı mefrûz-ı mezbûru zikr olunan sagīrelerin hâdimeleriyle nafakalarına harc ü sarfa ve vakt-i hâcetde istidâneye ve lede’z-zafer mallarına rücû‘a vasiyy-i mezbûra izin vermeğin mâ-vaka‘a kayd-şüd. Fî gurre-i Safer sene 1110 Şuhûdü’l-hâl: Osman Ağa b. Mehmed, Ali Ağa b. el-Hâc Fethullah, Ali Çelebi b. Ömer, Hasan Çelebi b. Hüseyin, Mehmed Çelebi b. Hızır, İsmail Çelebi b. Ömer, Süleyman Çelebi b. Abdullah.