Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 210 Hüküm no: 120 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar Mustafa’nın vasisi olduğu Attar İbrahim Çelebi’nin Fransız tacir Polikoryon’da olan alacağını tahsil ettiği Husûs-ı âti’l-beyânın mahallinde istimâ‘ ve tahrîri içün savb-ı şer‘-i enverden irsâl olunan Mevlânâ Ahmed Efendi b. İsmail Efendi mahmiye-i İstanbul’da <> Attârlar sûkunda İbrahim Çelebi b. Mustafa’nın menziline varıp zeyl-i vesîkada mektûbü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede el-Hâc Hasan mahallesinde sâkin iken bundan akdem vefât eden Attâr el-Hâc Mustafa b. Mahmud’un sulbiye sagīre kızları Hadîce ve Emine ve Safiye’nin tesviye-i emrlerine min-kıbeli’ş-şer‘ vasî nasb olunan Attâr İbrahim Çelebi b. Mustafa meclis-i ma‘kūd-ı mezbûrda Françe tüccârından olup mahrûse-i Galata’da Beyoğlu nâm mahalde sâkin Polikoryon v. Polihron nâm Françe muvâcehesinde bi’l-vesâye üzerine da‘vâ ve takrîr-i kelâm edip müteveffâ-yı mezbûrun işbu yedimde olan deyn temessüğü mûcebince mesfûr Polikoryon zimmetinde cihet-i deyn-i şer‘îden bin yetmiş dört guruş hakkı olup meblağ-ı mezbûr bin yetmiş dört guruşu kable’l-ahz ve’l-istîfâ fevt olmağla meblağ-ı mezbûr bin yetmiş dört guruşu vesâyetim hasebiyle mesfûr Polikoryon’dan taleb ederim suâl olunup meblağ-ı mezbûru bana edâ ve teslîme mesfûra tenbîh olunmak matlûbumdur dedikde gıbbe’s-suâl mezbûr Polikoryon meblağ-ı mezbûr bin yetmiş dört guruş cihet-i mezbûreden zimmetimde müteveffâ-yı mezbûr el-Hâc Mustafa b. Mahmud’a vâcibü’l-edâ deyni olduğunu ikrâr u i‘tirâf etmekle alâ-mûcibi ikrârihî meblağ-ı mezbûr bin yetmiş dört guruşu vasiyy-i mezbûr İbrahim Çelebi’ye edâ ve teslîm mesfûr Polikoryon’a ba‘de’l-hükm ve’t-tenbîh vasiyy-i mezbûr İbrahim Çelebi meclis-i ma‘kūd-ı mezbûrda mesfûr Polikoryon mahzarında bi’l-vesâye ikrâr ve takrîr-i kelâm edip ânifen edâsına hükm ve tenbîh olunan meblağ-ı mezbûr bin yetmiş dört guruşu vesâyetim hasebiyle mesfûr Polikoryon yedinden tamâmen alıp kabz eyledim meblağ-ı mezbûr bin yetmiş dört guruşdan mesfûr Polikoryon yedinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan el-Hâc Abdullah b. Mehmed ve Hasan Çelebi b. Abdullah ile meclis-i şer‘a gelip alâ-vukū‘ihi inhâ etmeğin mâ-vaka‘a kayd-şüd. Fî 15 Muharrem sene 1110 Şuhûdü’l-hâl: Es-sâbikūn es-sâbikūn.