Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 210 Hüküm no: 121 Orijinal metin no: [35b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı cariye Gülbuy’un hür olduğunu ispat ettiği Husûs-ı âti’l-beyânın mahallinde istimâ‘ ve tahrîri iltimâs olunmağın kıbel-i şer‘den me’zûnen Mevlânâ Mehmed Rûşen Efendi irsâl olunup ol dahi mahmiye-i İstanbul’da Uzunçarşı kurbünde Samanveren mahallesi sükkânından iken bundan akdem vefât eden el-Hâc Mustafa b. Abdi’nin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûra rıkk-ı sâbıkını mu‘terife işbu uzun boylu açık kaşlı gök elâ gözlü Rusiyyetü’l-asl Müslimetü’l-mille bâ‘isetü’l-kitâb Gülbuy bt. Abdullah meclis-i ma‘kūd-ı mezbûrda müteveffâ-yı mezbûrun sülüs malını vücûh-ı birr ü hayra sarfa ve sülüsânını veresesine îsâle vasiyy-i muhtârı olmağla terekesine bi’l-vesâye vaz‘-ı yed eden el-Hâc Hüseyin b. Süleyman mahzarında üzerine da‘vâ ve takrîr-i kelâm edip seyyidim müteveffâ-yı mezbûr fevtinden bir sene mukaddem hâl-i sıhhatinde hasbeten lillâhi’l-aliyyi’l-Hallâk beni malından tahrîr ve i‘tâk edip ben sâir harâir-i asliyât gibi hürre olmuş iken vasiyy-i mezbûr beni rık olup müteveffâ-yı mezbûrun terekesinden olmak üzere bana vaz‘-ı yed eder suâl olunsun dedikde gıbbe’s-suâl vasiyy-i mezbûr cevâbında vech-i muharrer üzere terekesine vaz‘-ı yedini ikrâr ve müdde‘i[yye]-i mezbûrenin vech-i meşrûh üzere müdde‘âsını inkâr edicek müdde‘iye-i mezbûreden sıdk-ı makāline beyyine taleb olundukda udûl-ı Müslimînden mahalle-i mezbûre sükkânından müteveffâ-yı mezbûrun karındaşı Hüseyin b. Abdi ve el-Hâc Hasanzâde mahallesinde Kenan Beşe b. Abdullah li-ecli’ş-şehâde meclis-i ma‘kūda hâzırân olup istişhâd olundukda fi’l-hakīka müteveffâ-yı mezbûr el-Hâc Mustafa b. Abdi fevtinden bir sene mukaddem hâl-i sıhhatinde işbu müdde‘iye-i mezbûre Gülbuy bt. Abdullah’ı hasbeten lillâhi’l-aliyyi’l-Hallâk huzûrumuzda malından tahrîr ve i‘tâk ve zümre-i harâir-i asliyâta idrâc ve ilhâk [36a] eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde gıbbe ri‘âyet-i şerâiti’l-kabûl şehâdetleri makbûle olmağın mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Çukadâr el-Hâc Abdullah b. Mehmed ile meclis-i şer‘a gelip alâ-vukū‘ihi inhâ ve takrîr etmeğin kayd-şüd. Fî 24 Muharrem sene 1110 Şuhûdü’l-hâl: İmâm Mehmed Efendi b. Ali, Mehmed Ağa b. Mustafa, Ali Çelebi b. Abdullah, Osman Çelebi b. Mehmed, Kenan Beşe b. Abdullah, el-Hâc Hızır b. Osman.