Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 213 Hüküm no: 123 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe’nin vefat eden Mustafa ile ortak olduklarını ispat ettiği Kezâlik mevlânâ-yı mezbûr Rûşen Efendi akd-i meclis-i şer‘-i şerîf ettikde mahalle-i mezbûre ahâlîsinden müteveffâ-yı mezbûrun vech-i âtî üzere şerîki olduğunu iddi‘â eden bâ‘isü’l-kitâb Ali Beşe b. Abdullah meclis-i ma‘kūd-ı mezbûrda müteveffâ-yı mezbûrun sülüs malını vücûh-ı birr-i mu‘ayyeneye sarfa ve sülüsânını veresesine îsâle bâ-hüccet-i şer‘iyye vasiyy-i muhtârı olmağla terekesine bi’l-vesâye vaz‘-ı yed eden el-Hâc Hüseyin b. Süleyman mahzarında üzerine da‘vâ ve takrîr-i kelâm edip müteveffâ-yı mezbûr el-Hâc Mustafa b. Abdi b. Mehmed târîh-i kitabdan iki sene mukaddem kendi malından dört yüz guruş ve ben yüz guruş ihrâc ve birbirine halt edip işbu mahzen içinde mu‘âyene olunan tuz ve hasırı bey‘ u şirâ ve hâsıl olan nemâ beynimizde münâsafe olmak vechi üzere akd-i şirket edip hattâ müteveffâ-yı mezbûrun fevtinden otuz gün mukaddem hâl-i marazında huzûr-ı Müslimînde beynimizde olan [36b] hesâbı gördüğümüzde mahzen-i mezbûr içinde re’s-i malımız olan meblağ-ı mezbûr beş yüz guruş zuhûr edip minvâl-i muharrer üzere ticâret üzere iken müteveffâ-yı mezbûr vefât ettikde vasiyy-i mezbûr mecmû‘-ı mal müteveffâ-yı mezbûrun olmak zu‘muyla mecmû‘una bi-gayr-ı hakkın vaz‘-ı yed eder suâl olunsun dedikde gıbbe’s-suâl vasiyy-i mezbûr cevâbında terekesine vech-i muharrer üzere vaz‘-ı yedini ikrâr ve müdde‘î-i mezbûrun vech-i meşrûh üzere müdde‘âsını inkâr edicek müdde‘î-i mezbûrdan sıdk-ı makāline beyyine taleb olundukda udûl-ı Müslimînden mahrûse-i Galata muzâfâtından kasaba-i Tophane mahallâtından Karabaş mahallesi sükkânından Mehmed Çelebi b. Hüseyin ve Yavaşça Şahin mahallesi sükkânından Mehmed Beşe b. Halil li-ecli’ş-şehâde meclis-i ma‘kūd-ı mezbûra hâzırân olup istişhâd olundukda fi’l-hakīka müteveffâ-yı mezbûr ile müdde‘î-i mezbûr Ali Beşe müteveffâ-yı mezbûrun fevtinden otuz gün mukaddem hesâb gördüklerinde işbu mahzenin içinde olan beş yüz guruşun dört yüz guruşu benim ve yüz guruşu Ali Beşe’nin re’s-i malımızdır deyü müteveffâ-yı mezbûr huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde gıbbe ri‘âyet-i şerâiti’l-kabûl şehâdetleri makbûle olmağın gıbbe’t-tahlîfi’ş-şer‘î mûcebiyle ba‘de’l-hükm vâki‘ hâli kezâlik inhâ etmeğin kayd-şüd. Fî 26 min-Muharrem sene 1110 Şuhûdü’l-hâl: Es-sâbikūn es-sâbikūn.