Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 214 Hüküm no: 124 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin vefat eden Mustafa’nın vasisi olduğunu ispat ettiği Fi’l-asl Vilâyet-i Anadolu’da Alâiye sancağında Manavgat kazâsına tâbi‘ Sart nâm karye sükkânından olup mahmiye-i İstanbul’da Uzunçarşı kurbünde Samanveren mahallesinde sâkin iken bundan akdem vefât eden el-Hâc Mustafa b. Abdi b. Mehmed’in verâseti li-ebeveyn kebîr er karındaşı olup mahalle-i mezbûrede sâkin Hüseyin ile karye-i mezbûrede sâkin li-ebeveyn âhar karındaşı Ali ve kız karındaşı Emine’ye münhasıra olduğu şer‘an zâhir ve mütebeyyin oldukdan sonra mahmiye-i mezbûrede Sekbanbaşı Yakub Ağa mahallesi sükkânından bâ‘isü’l-kitâb el-Hâc Hüseyin b. Süleyman mahfil-i kazâda müteveffâ-yı mezbûrun kebîr karındaşı olmağla terekesine vaz‘-ı yed eden mezbûr Hüseyin mahzarında üzerine da‘vâ ve takrîr-i kelâm edip müteveffâ-yı mezbûr fevtinden beş buçuk ay mukaddem hâl-i marazında bi-emrillâhi te‘âlâ fevt olduğumda menzilimin içinde olan eşyâ-i ma‘lûmemden mâ‘adâ yanımda mevcûde olan eşyâ-i memlûkem ba‘de’l-kabz semen-i misilleriyle bey‘ olunup hâsıl olan meblağdan vech-i mesnûn üzere levâzım-ı techîz ve tekfînim görüldükden sonra meblağ-ı mezbûrun sülüsü ifrâz ve meblağ-ı müfrez-i mezbûrun yirmi guruşunu vasiyy-i muhtârım el-Hâc Hüseyin b. Süleyman kabz eyleye ve yirmi guruşuyla üç kıt‘a Mushaf-ı şerîf iştirâ olunup bir kıt‘ası Abdullah Efendi’ye ve bir kıt‘ası Molla Ahmed’e ve bir kıt‘ası Fâtıma bt. Abdullah’a verile ve sülüs-i mezbûrun yirmi guruşu zikr olunan Sart karyesinin avârızına vakf olup dayım Yusuf b. Abdurrahman mütevellîsi ola ve on beş guruş üvey kız karındaşım Fâtıma bt. Abdi’ye ve on beş guruş vasiyy-i mezbûrun oğlu Molla Ahmed’e ve on guruş mezbûr Abdullah Efendi’ye ve beş guruşu Bandırma’da sâkin Usta Yusuf’a verile ve on guruş Hadîce Hatun bt. Abdullah’a verilip bâkīsi karye-i mezbûrede sâkin li-ebeveyn karındaşım Ali ve Emine’ye îsâl oluna deyü huzûr-ı Müslimînde vasiyet ve tenfîzine beni vasiyy-i muhtâr nasb ü ta‘yîn ben dahi muvâcehesinde ba‘de’l-kabûl musırran-aleyhâ vefât edip tenfîz-i vesâyâ murâd eylediğimde karındaşı mezbûr Hüseyin mâni‘ olur suâl olunsun dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda udûl-ı Müslimînden zikr olunan Sekbanbaşı Yakub Ağa mahallesi sükkânından el-Hâc Cafer b. Süleyman ve el-Hâc Hasanzâde mahallesi sükkânından Kenan Beşe b. Abdullah li-ecli’ş-şehâde meclis-i şer‘a hâzırân olup istişhâd olundukda fi’l-hakīka müteveffâ-yı mezbûr el-Hâc Mustafa b. Abdi b. Mehmed fevtinden beş buçuk ay mukaddem hâl-i marazında bi-emrillâhi te‘âlâ fevt olduğumda menzilimin içinde olan eşyâ-i ma‘lûmemden mâ‘adâ yanımda mevcûd olan eşyâ-i memlûkem ba‘de’l-kabz semen-i misilleriyle bey‘ olunup hâsıl olan meblağdan vech-i mesnûn üzere kezâlik vech-i meşrûh üzere bâkīsi karındaşım Ali ve kız karındaşım Emine’ye îsâl oluna deyü huzûrumuzda vasiyet ve tenfîzine müdde‘î-i mezbûr el-Hâc Hüseyin’i vasiyy-i muhtâr nasb ü ta‘yîn edip ol dahi muvâcehesinde ba‘de’l-kabûl musırran-aleyhâ vefât eyledi biz bu husûsa [37a] bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a kayd-şüd. Fî 3 min-Safer sene 1110 Şuhûdü’l-hâl: Usta Ali b. Mehmed, el-Hâc Osman b. Mustafa, Abdullah Çelebi b. Mehmed, İmâm Molla Ahmed b. Ali, Ali Çelebi b. Abdullah, İbrahim Çelebi b. Süleyman.