Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 223 Hüküm no: 127 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun ile Ayşe Hatun vefat eden Emetullah Hatun’un mirasçıları olduklarını ispat ettikleri Mahmiye-i İstanbul’da Karabaş mahallesinde sâkine iken bundan akdem vefât eden Emetullah Hatun bt. Hasan Efendi b. Mustafa’nın verâseti zevc-i metrûku Hamza Beşe b. Ali ile vâlidesi Hamide Hatun bt. Abdullah’a ve kasaba-i Kastamonu’da Câmi‘-i kebîr mahallesinde sâkin li-ebeveyn ammi oğlu Ali b. Mustafa’ya münhasıra oldukdan sonra mezbûr Ali dahi hisse-i müntakilesini kable’l-ahz fevt olmağla verâseti zevce-i menkûha-i metrûkesi Saliha bt. Mehmed [ve] li-ebeveyn kız karındaşı Âişe bt. Mustafa’ya münhasıra oldukdan [sonra] mezbûre Saliha bt. Mehmed b. Hasan tarafından husûs-ı âti’l-beyânda iddi‘â-i vekâlet eden babası mezbûr Mehmed b. Hasan ve mezbûre Âişe bt. Mustafa b. Hüseyin tarafından kezâlik husûs-ı âti’z-zikrde iddi‘â-i vekâlet eden Abdullah b. Hızır meclis-i şer‘de evvelâ vefât eden mezbûre Emetullah’ın zevci müteveffâ-yı mezbûr Ali’nin hisse-i müntakilesine kıbel-i şer‘den vasî ve kayyım nasb olunmağla vaz‘-ı yed eden mezbûr Hamza Beşe mahzarında her biri üzerine da‘vâ ve takrîr-i kelâm edip mezbûr Ali b. Mustafa b. Hüseyin müteveffât-ı mezbûre Emetullah’dan ber-mûceb-i defter-i kassâm-ı askerî para dört hesâbı üzere kendüye isâbet eden dokuz bin dokuz yüz dört akçesini kable’l-ahz fevt olmağla meblağ-ı merkūm zevce-i menkûhası mezbûre Saliha ile li-ebeveyn kız karındaşı mezbûre Âişe’ye isâbet ve intikāl edip ve biz mezbûreler taraflarından vekîlleri olmağla meblağ-ı merkūmu mezbûr Hamza Beşe’den taleb eylediğimizde teslîmden imtinâ‘ eder suâl olunsun dediklerinde gıbbe’s-suâl mezbûr Hamza Beşe cevâbında hisse-i müntakile-i mezbûreye vaz‘-ı yedini ikrâr ve mezbûrelerin vech-i muharrer üzere verâsetlerini ve taraflarından müdde‘iyân-ı mezbûrânın vekâletlerini inkâr edicek evvelâ mezbûre Saliha’nın vekîli mezbûr Mehmed’den müdde‘âsına beyyine taleb olundukda udûl-ı Müslimînden kasaba-i mezbûreye tâbi‘ Hocalar nâm karye ahâlîsinden olup mahmiye-i mezbûrede Ayasofya-i kebîr mahallesinde müsâfiren sâkin Abdülkerim b. Abdüllatif ve Dizdarlı nâm karye sükkânından olup mahmiye-i mezbûrede Kumkapı kurbünde Süleyman Ağa mahallesinde müsâfiren sâkin Hüseyin b. Behram li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-yı mezbûr Ali b. Mustafa b. Hüseyin’in mezbûre Saliha bt. Mehmed b. Hasan zevce-i menkûha-i metrûkesi ve vârisesidir ve hisse-i müntakilesini vaz‘-ı yed eden mezbûr Hamza Beşe’den taleb ve da‘vâ ve lede’l-hâce mürâfa‘a ve sulh ve ibrâya ve ahz u kabza ve kendüye îsâle ve bunların mütevakkıf olduğu umûrun küllîsine tarafından babası işbu mezbûr Mehmed b. Hasan’ı huzûrumuzda vekîl ve nâibi menâb nasb ü ta‘yîn eyledikde ol dahi vekâlet-i mezbûreyi kabûl eyledi ve sâniyen mezbûr Abdullah’dan müdde‘âsına beyyine taleb olundukda udûl-ı Müslimînden şâhidân-ı mezbûrân Abdülkerim ve Hüseyin li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûre Âişe bt. Mustafa b. Hüseyin müteveffâ-yı mezbûr Ali’nin li-ebeveyn kız karındaşı ve vârisesidir babaları ismi mezbûr Mustafa ve dedeleri ismi mezbûr Hüseyin ve anaları ismi Emine ve maskat-ı re’sleri Zari kazâsına tâbi‘ Ilgazlar nâm karyedir zâhirde müteveffâ-yı mezbûr Ali’nin mezbûre Âişe’den gayrı vâris ve terekesine müstahıkk-ı âhar olduğu ma‘lûmumuz değildir ve mezbûre Âişe hisse-i müntakilesini işbu mezbûr Hamza Beşe’den taleb ve da‘vâ ve lede’l-iktizâ mürâfa‘a ve muhâsamaya ve sulh ve ibrâya ve ahz u kabza ve kendüye îsâle ve bunların mütevakkıf olduğu umûrun cümlesine tarafından işbu Abdullah’ı huzûrumuzda vekîl ve nâib-i menâb nasb ü ta‘yîn eyledikde ol dahi vekâlet-i mezbûreyi kabûl eyledi biz bu husûslara şâhidleriz şehâdet dahi ederiz deyü her biri [38b] edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm mâ-vaka‘a kayd-şüd. Fî 11 Safer sene 1110 Şuhûdü’l-hâl: es-Seyyid Abdülmuti Efendi, el-Hâc Süleyman Çukadâr, İsmail Efendi Parmakzâde, Abdurrahman Efendi b. Ahmed Efendi, Kara Mehmed b. Hüseyin, Ahmed Çelebi b. Süleyman.