Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 225 Hüküm no: 129 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Safiye Hatun’un mirasçılarının terekeden olan evi Süleyman’a sattıkları Mahmiye-i İstanbul’da Mimâr Acem Halil mahallesinde sâkine iken bundan akdem vefât eden Safiye Hatun bt. Cerrâh Halil Çelebi b. İbrahim’in verâseti vâlidesinin vâlidesi Ümmühani Hatun bt. Abdullah ile babası mezbûr Halil Çelebi’ye ve sadrî sagīr oğlu es-Seyyid Ataullah Mustafa b. es-Seyyid Abdullah Efendi’ye münhasıra ve mezbûre Safiye Hatun sülüs malını vücûh-ı birre vasiyet eylediği şer‘an mütehakkık olmağla tashîh meselesi dokuz sehmden olup sihâm-ı mezbûrenin üç sehmi sülüse ve bir sehmi mezbûre Ümmühani Hatun’a ve bir sehmi babası mezbûr Halil Çelebi’ye ve dört sehmi sagīr-i mezbûra isâbet edip ba‘dehû mezbûr Halil Çelebi dahi mahrûse-i Edirne’de medyûnen vefât etmekle veresesi terekesinden kasr-ı yed etmeleri mütehakkik oldukdan sonra zâtı mahalle-i mezbûre imâmı Ali Efendi b. Ahmed ve Müezzin Şeyhzâde Ahmed Çelebi b. Mehmed ta‘rîfleriyle mu‘arrefe olan mezbûre Ümmühani Hatun asâleten ve müteveffât-ı mezbûrenin vasiyy-i muhtârı ve sagīr-i mezbûrun babası ve velîsi mezbûr es-Seyyid Abdullah Efendi b. el-merhûm es-Seyyid Mustafa Efendi vesâyeten ve velâyeten ve müteveffâ-yı sânî-i mezbûr Halil Çelebi’nin tereke-i kāsırasını kabz ve düyûn-ı müsbetesini edâya taraf-ı şer‘den hüccet-i şer‘iyye ile vasî ve kayyım nasb olunan Mehmed Çelebi b. Süleyman dahi vesâyeten meclis-i şer‘-i şerîfde mahmiye-i mezbûrede Davudpaşa mahallesinde sâkin işbu bâ‘isü’l-kitâb el-Hâc Süleyman b. Ahmed mahzarında her biri ikrâr ve takrîr-i kelâm edip müteveffât-ı mezbûrenin terekesinden olup zikr olunan Mimâr Acem mahallesinde vâki‘ bir tarafdan Mustafa Çelebi menzili ve hamam ve iki tarafdan Süleyman Ağa b. İbrahim menzili ve bir tarafdan tarîk-i âm ile mahdûd hâriciye ve dâhiliye fevkānî ve tahtânî büyût-ı adîde ve hamam ve köşk ve büyük bahçeyi müştemil mülk menzili izn-i şer‘le altı ay mikdârı Münâdî el-Hâc Yusuf yediyle sûk-ı sultânîde ve mecma‘-ı nâsda ba‘de’n-nidâ ve’l-müzâyede ve inkıtâ‘u’r-rağabât mezbûr el-Hâc Süleyman üzerinde bin beş yüz guruşa karâr edip ziyâde ile tâlib-i âhar zuhûr etmeyip ve meblağ-ı mezbûr bin beş yüz guruş el-yevm menzil-i mahdûd-ı mezbûrun semen-i misli olduğu mahalle-i mezbûre ahâlîsinden kıdvetü’l-meşâyihi’l-kâmilîn Mimâr tekyesi şeyhi es-Seyyid Ahmed Efendi b. Mahmud ve İmâm Ali Efendi b. Ahmed ve Müezzin Şeyhzâde Seyyid Ahmed ve el-Hâc Cuma b. el-Hâc Abdi [ve] Derviş Abdüllatif b. Abdi ve Derviş Mehmed b. Bektaş ve İbrahim b. Mehmed ve Mustafa Çelebi ihbârlarıyla lede’ş-şer‘i’ş-şerîf zâhir ve mütebeyyin olmağın biz dahi asâleten ve velâyeten ve vesâyeten menzil-i mahdûd-ı mezbûru bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık bey‘-i bâtt-ı kat‘î ile mezbûr el-Hâc Süleyman’a bin beş yüz guruşa bey‘ u temlîk ve teslîm ve ol dahi iştirâ ve kabûl ve tesellüm ettikden sonra semeni olan meblağ-ı mezbûr bin beş yüz guruşu mezbûr el-Hâc Süleyman yedinden bi-kadri’l-hısâs tamâmen ahz u kabz eyledik ba‘de’l-yevm menzil-i mahdûd-ı merkūm cümle müştemilâtıyla müşteri-yi mezbûr el-Hâc Süleyman’ın mülk-i müşterâsı olmuşdur keyfe mâ yeşâ ve yehtâr mutasarrıf olsun dediklerinde gıbbe’t-tasdîkı’ş-şer‘î kayd-şüd. Fî 17 Muharrem sene 1110 Şuhûdü’l-hâl: eş-Şeyh Ahmed Efendi, İmâm Ali Efendi b. Ahmed, Şeyhzâde Ahmed Çelebi el-Müezzin, el-Hâc Cuma b. Abdi, Derviş İbrahim b. Mehmed, Mustafa Çelebi b. Mehmed.