Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 229 Hüküm no: 131 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emin Mehmed Efendi’nin varislerinden annesi Hamide Hatun’un miras hissesini alıp zimmetini ibra ettiği Mahmiye-i İstanbul’da Şeyh Resmî mahallesinde sâkin iken bundan akdem vefât eden merhûm Emin Mehmed Efendi b. Ârif Mehmed Efendi’nin verâseti zevce-i menkûha-i metrûkesi Ümmühani Hatun bt. el-merhûm Şeyhzâde Mehmed Efendi’ye ve vâlidesi Hamide Hatun bt. Şinasi Abdurrahman Efendi’ye ve sagīr oğlu Abdullah’a ve sagīre kızı Râbia’ya münhasıra ve tashîh-i meselesi yetmiş iki sehmden olup sihâm-ı mezbûrenin dokuz sehmi zevcesi mezbûreye ve on iki sehmi vâlidesi merkūmeye ve bâkī elli bir sehmin otuz dört sehmi oğlu sagīr-i mezbûra ve on yedi sehmi kızı sagīre-i mezbûreye isâbeti tahakkukundan sonra zâtı mahalle-i mezbûreden Hüseyin Çelebi b. Cafer ve Ahmed Çelebi b. Süleyman ta‘rîfleriyle mu‘arrefe olan vâlidesi mezbûre Hamide Hatun mahfil-i kazâda sagīrân-ı mezbûrânın vâlidesi ve tesviye-i emrlerine kıbel-i şer‘den vasiye-i mansûbeleri mezbûre Ümmühani Hatun bt. el-merhûmü’l-mezbûr Şeyhzâde Mehmed Efendi b. eş-Şeyh Süleyman Efendi tarafından husûs-ı âti’l-beyânda müseccel vekîli olmağla terekesine bi’l-vekâle vaz‘-ı yed eden bâ‘isü’l-kitâb el-Hâc Ahmed b. Abdulkadir muvâcehesinde ikrâr ve takrîr-i kelâm edip oğlum müteveffâ-yı mezbûrun terekesinden tashîh-i mezbûr üzere bana isâbet eden on iki sehmim mukābelesinde müteveffâ-yı mezbûrun terekesinden işbu yüz elli guruş kıymetli Çerkesiyyetü’l-asl Gülbuy nâm câriye ile nakd on guruşu şurût-ı sıhhati hâvî mevâni‘-i şer‘iyyeden ârî tehârüc-i şer‘î üzere ahz u kabz edip oğlum müteveffâ-yı mezbûra mülâzım olmak içün verdim deyü iddi‘â eylediğim dört yüz on guruş da‘vâsından ve müteveffâ-yı mezbûrun kalîl ü kesîr cemî‘ terekesine müte‘allıka âmme-i mîrâs da‘vâsından ve oğlum müteveffâ-yı mezbûrun hîn-i fevtine gelince beynimizde cârî ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allıka âmme-i de‘âvî ve mutâlebâtdan mezbûre Ümmühani Hatun’un ve sagīrân-ı mezbûrânın zimmetlerini ibrâ-i âmm-ı kâtı‘u’n-nizâ‘la ibrâ ve iskāt eyledim ba‘de’l-yevm mezbûrlar ile vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-Saferi’l-hayr li-seneti aşer ve mi’ete ve elf. Şuhûdü’l-hâl: Mukayyid Mustafa Efendi, es-Seyyid Abdülmuti Efendi, Zekâî Mustafa Efendi b. Hasan, Ahmed Efendi b. Emin Mehmed Efendi, İskilibî Mehmed Efendi, Ahmed Efendi b. İsmâil Efendi, Ahmed Çelebi b. Süleyman, Çukadâr el-Hâc Süleyman, el-Hâc Abdullah b. Mehmed ve gayruhum mine’l-huzzâr.