Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 230 Hüküm no: 132 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mehmed Emin Efendi’nin çocukları için anneleri Ümmühani Hatun’un vasi tayin edilip, çocuklara nafaka takdir edildiği Mahmiye-i İstanbul’da Şeyh Resmî mahallesinde sâkin iken bundan akdem vefât eden Mehmed Emin Efendi b. Ârif Mehmed Efendi’nin sulbî sagīr oğlu Abdullah Çelebi ve sulbiye-i sagīre kızı Râbia’nın vakt-i rüşd ü sedâdlarına değin tesviye-i emrlerine bir vasî nasbı lâzım ve mühim olmağla müteveffâ-yı mezbûrun zevce-i menkûha-i metrûkesi ve zikr olunan sagīrlerin vâlideleri işbu bâ‘isetü’l-kitâb Ümmühani Hatun bt. el-merhûm Şeyhzâde Mehmed Efendi mahmûdü’l-hâl olup vesâyet uhdesinden gelmeğe kādire idiği lede’ş-şer‘i’ş-şerîf zâhir ve mütebeyyin olmağın hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri mezbûre Ümmühani Hatun’u oğulları [evlâdı] sagīrân-ı mezbûrân Abdullah Çelebi ve Râbia’nın tesviye-i emrlerine vasî nasb ü ta‘yîn buyurup ol dahi vesâyet-i mezbûreyi kabûl ve merâsim-i lâzımesini edâya ta‘ahhüd ve iltizâm eyledikden sonra sagīrân-ı mezbûrânın nafaka ve kisveye eşedd-i ihtiyâcları olmağla vasiye-i mezbûr[e] talebiyle mal-ı müntakillerinden mezbûr Abdullah Çelebi’ye yevmî üç para ve mezbûre Râbia’ya yevmî iki para nafaka ve kisve-bahâ farz ve takdîr buyurup meblağ-ı mefrûz-ı mezbûr yevmî beşer parayı sagīrân-ı mezbûrânın levâzım-ı zarûriyelerine harc ü sarfa ve inde’z-zarûre istidâneye ve lede’z-zafer mallarına rücû‘a vasiye-i mezbûreye izin birle mâ-vaka‘a kayd-şüd. Fî gurre-i Safer sene 1110 Şuhûdü’l-hâl: Yahya Efendi b. Mustafa Efendi, Süleyman Efendi b. Mehmed Efendi, Ahmed Efendi b. Mehmed Efendi, diğer Molla Ahmed b. Mehmed, Abdi Çelebi b. Mehmed, Hüseyin Çelebi b. Cafer, el-Hâc Ahmed b. Abdulkadir.