Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 234 Hüküm no: 137 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Haffaf Mehmed’in oğlu İshak’ın hizmetini görmek üzere bir cariye satın alınmasına izin verildiği Mahmiye-i İstanbul’da Çelebioğlu mahallesinde sâkin iken bundan akdem vefât eden Haffâf el-Hâc Mehmed b. Mustafa’nın sulbî sagīr oğlu İshak Çelebi’nin vâlidesi ve hâdinesi olup zâtı Ahmed Çelebi b. Süleyman ve İbrahim Çelebi b. Mehmed ta‘rîfleriyle mu‘arrefe olan Hadîce Hanım bt. el-merhûm İshak Paşa mahfil-i kazâda oğlu sagīr-i mezbûrun tesviye-i umûruna vasiyy-i muhtârı olmağla mal-ı müntakilesine bi’l-vesâye vaz‘-ı yed eden bâ‘isü’l-kitâb Haffâf el-Hâc Mehmed b. Hüseyin muvâcehesinde takrîr-i kelâm edip hacr [u] terbiyemde olan oğlum sagīr-i mezbûr İshak Çelebi’nin bir nefer hâdime câriye iştirâsına eşedd-i ihtiyâcı olmağın vasiyy-i mezbûr yedinde olan mal-ı müntakilinden bir nefer hâdime câriye iştirâsına kıbel-i şer‘den me’zûn olunmak matlûbumdur dedikde hâdine-i mezbûrenin kelimât-ı meşrûhası vâkı‘a mutâbıka olmağla hâkim-i muvakkı‘-i sadr-ı kitâb efendi sagīr-i mezbûra istihdâm için mal-ı müntakilinden bir re’s hâdime câriye iştirâsına vasiyy-i mezbûra izin birle mâ-vaka‘a kayd-şüd. Fî 3 Safer sene 1110 Şuhûdü’l-hâl: Mukayyid Mustafa Efendi, es-Seyyid Abdülmuti Efendi, Yahya Efendi b. Mustafa Efendi, Ahmed Efendi b. Şeyhzâde, Ahmed Çelebi b. Süleyman, Mehmed Beşe b. Hüseyin, Hüseyin Beşe b. Mehmed.