Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 241 Hüküm no: 144 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Reis’in varislerinden hanımı Kerime Hatun ile oğlu Salih’in mallarını korumak üzere diğer oğlu Mehmed Beşe’nin vasi tayin edildiği Vilâyet-i Anadolu’da Urla kasabasından olup mahmiye-i İstanbul hısnı ebvâbından Odunkapısı hâricinde Sebzehâne iskelesinde merbût sefînede vefât eden Mustafa Reis b. Mehmed’in zevce-i menkûha-i metrûkesi Kerime Hatun ile kebîr oğlu Salih nâm gāiblerin hisse-i şer‘iyyelerini ahz u kabz ve hıfza cânib-i şer‘den bir vasî nasb ü ta‘yîn olunmak lâzım ve mühim olmağın emânet ile ma‘rûf ve vesâyet uhdesinden gelmeğe kādir idiği zeyl-i kitâbda muharrerü’l-esâmî Müslimîn ihbârlarıya lede’ş-şer‘i’ş-şerîf zâhir ve mu‘ayyen olan müteveffâ-yı mezbûrun âhar kebîr oğlu hâfızü’l-kitâb Mehmed Beşe nâm kimesneyi hâkim-i muvakkı‘-i sadr-ı kitâb tûbâ-lehû ve hüsnü-meâb efendi vech-i muharrer üzere mezbûrân Kerime ve Salih’in hisselerini ahz u kabz ve hıfza vasî ve kayyım nasb ü ta‘yîn eyledikde ol dahi vesâyet-i mezbûreyi kabûl ve merâsimini edâya ta‘ahhüd etmekle mâ-vaka‘a kayd-şüd. Fî 12 min-Safer sene 1110 Şuhûdü’l-hâl: el-Hâc İbrahim Ağa b. Süleyman, el-Hâc Mehmed Çelebi Bostânî, el-Hâc Ali b. Mustafa, el-Hâc Salih b. Mehmed, el-Hâc Ali b. Şa‘bân.