Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 241 Hüküm no: 145 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çorbacı Mustafa Ağa’nın vasisi Rahime Hatun’un, Ahmed Çelebi’de kalan parayı teslim aldığı Mahmiye-i İstanbul’da Kazasker Mehmed Efendi mahallesinde sâkine iken bundan akdem vefât eden Âişe bt. el-merhûm Abdi Halîfe nâm sagīrenin verâseti Nemçe keferesi ma‘rekesinde gāib olan li-ebeveyn ammi Çorbacı Mustafa Ağa b. Mehmed’e münhasıra oldukdan sonra gāib-i mezbûrun hisse-i müntakilesini zabt ve hıfza kıbel-i şer‘den vasî ve kayyım nasb olunan vâlidesi Rahime Hatun bt. Yusuf’un zâtı ta‘rîf-i şer‘î ile mu‘arrefe oldukdan sonra meclis-i şer‘-i hatîr-ı lâzımü’t-tevkīrde sagīre-i mezbûrenin hayâtında vasiyy-i mansûbu olmağla anasından isâbet eden hissesini kabz eden işbu bâ‘isü’l-vesîka Ahmed Çelebi b. Abdullah mahzarında bi’l-vesâye ikrâr ve takrîr-i kelâm edip mezbûr Ahmed Çelebi sagīre-i müteveffât-ı mezbûrenin vasîsi olmağla bi’l-vesâye malından ber-mûceb-i defter makbûzu olan meblağdan sagīrenin techîz ve tekfîni ve nafaka ve sâir mesârifi ihrâc olundukdan sonra yedinde bâkī kalan beş yüz elli guruşu vasiyy-i mezbûr Ahmed Çelebi yedinden tamâmen ahz u kabz eyledim min-ba‘d ber-mûceb-i defter-i mezbûr Ahmed Çelebi yedinde ve zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a kayd-şüd. Fî 14 min-Safer sene 1110 Şuhûdü’l-hâl: Halil Efendi b. İbrahim, el-Hâc Süleyman Çukadâr, Mehmed Ağa b. Ahmed 16. Bölük, Hasan b. Mustafa el-Münâdî, Nasuh Beşe b. Yusuf, Ahmed Çelebi b. Süleyman, Mehmed Beşe b. Hüseyin, Ali Çelebi b. Abdullah.