Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 253 Hüküm no: 154 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın keresteci dükkânını Keresteci Ali oğlu Süleyman Çelebi’ye kiraya verdiği Mahmiye-i İstanbul’da Kocamustafapaşa <> kurbünde Canbâziye mahallesinde sâkin el-Hâc Mustafa b. İbrahim meclis-i şer‘-i şerîf-i lâzımü’t-teşrîfde mahmiye-i mezbûrede Hoca Halil Attâr mahallesinde sâkin iken bundan akdem vefât eden Keresteci el-Hâc Ali’nin kebîr oğlu hâfızü’l-kitâb Süleyman Çelebi mahzarında ikrâr ve takrîr-i kelâm edip müteveffâ-yı mezbûr el-Hâc Ali’den târîh-i fevtinden iki buçuk sene mukaddem üç yüz guruş bedel mukābelesinde yedimde olan mütevellî temessüğü mûcebince tefevvüz ve kabûl edip tasarrufumda olan mahmiye-i mezbûrede Keresteciler sûkunda vâki‘ lede’l-ahâlî ve’l-cîrân ma‘lûmü’l-hudûd vakıf keresteci dükkânını para üç akçeye olmak üzere yevmî on beşer akçe ücret ile târîh-i kitâbdan doksan gün tamâmına değin mezbûr Süleyman Çelebi’ye îcâr ve teslîm eyledim [de]dikde ol dahi vech-i muharrer üzere istîcâr ve kabûl etmeğin mâ-hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn li-seneti aşer ve mi’e ve elf min-hicreti men-lehû gāyetü’l-izz ve nihâyetü’ş-şeref. Şuhûdü’l-hâl: Seyyid Mustafa Efendi b. Mehmed, eş-Şeyh Mehmed Efendi b. el-Hâc Sunullah, Murad Efendi b. Hüseyin, el-Hâc Mustafa b. Mehmed, Abdullah Çelebi b. Hasan.