Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 257 Hüküm no: 159 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rus asıllı cariye Gülbeyaz’ın hür olduğunu ispat ettiği Kezâlik müteveffât-ı mezbûreye rıkk-ı sâbıkını mu‘terife işbu açık kaşlı elâ gözlü orta boylu Rusiyyetü’l-asl Müslimetü’l-mille hâfızatü’l-kitâb Gülbeyaz bt. Abdullah mahfil-i kazâda mahmiye-i mezbûrede bi’l-fi‘il Beytülmâl-ı hâssa emîni Mustafa Ağa b. Abdullah tarafından husûs-ı âti’l-beyânda müseccel vekîli ve kıbel-i şer‘den husûmet ve redd-i cevâba me’zûn ve müteveffât-ı mezbûrenin zâhirde vâris-i ma‘rûfu olmamak ile terekesi cânib-i mîrîye âid olmak üzere terekesine vaz‘-ı yed eden Mehmed Çelebi mahzarında üzerine da‘vâ ve takrîr-i kelâm edip seyyidem müteveffât-ı mezbûre hâl-i marazında fevtinden iki gün mukaddem hasbeten lillâhi te‘âlâ beni tahrîr ve i‘tâk ve silk-i harâir-i asliyâta idrâc ve ilhâk edip ben hürre olmuş iken vekîl-i mezbûr bana terekeden olmak üzere bi-gayr-ı hakkın vaz‘ eder suâl olunup sebîlim tahliye olunmak matlûbumdur dedikde gıbbe’s-suâl ve’l-inkâr müdde‘iye-i mezbûreden sıdk-ı makāline beyyine taleb olundukda udûl-ı Müslimînden mahmiye-i mezbûrede İskenderpaşa mahallesinde sâkin el-Hâc Osman Ağa b. Ali ve Hasan Çelebi b. İbrahim ve el-Hâc Mehmed b. İbrahim li-ecli’ş-şehâde meclis-i şer‘a hâzırûn olup isre’l-istişhâd fi’l-hakīka müteveffât-ı mezbûre fevtinden iki gün mukaddem müdde‘iye-i mezbûre Gülbeyaz’ı mülkünde olduğu hâlde huzûrumuzda hasbeten lillâhi te‘âlâ tahrîr ve i‘tâk ve silk-i harâir-i asliyâta idrâc ve ilhâk eyledi biz bu husûsa bu vech üzere kezâlik mûcebiyle ba‘de’l-hükm kayd-şüd. Fi’t-târîhi’l-mezbûr. Şuhûdü’l-hâl: Es-sâbikūn es-sâbikūn es-sâbikūn.