Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 256 Hüküm no: 158 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beytülmâl Emini Mustafa Ağa, Ayşe Hatun’a ait evin yarısıyla eşyaları zaptettiği iddiasıyla Emine Hatun’a açtığı davada haksız bulunduğu Mahmiye-i İstanbul’da Akşemseddin mahallesinde sâkine iken bundan akdem vefât eden Âişe Hatun bt. Ali’nin zâhirde vâris-i ma‘rûfu olmamağla cemî‘ terekesi cânib-i beytülmâle âid oldukdan sonra mahmiye-i mezbûrede bi’l-fi‘il Beytülmâli’l-hâssa emîni Mustafa Ağa b. Abdullah tarafından müseccel vekîli ve kıbel-i şer‘den husûs-ı âti’l-beyânda husûmet ve redd-i cevâba me’zûn olan Mehmed Çelebi b. Mustafa mahfil-i kazâda zâtı ta‘rîf-i şer‘î ile mu‘arrefe olan hâfızatü’l-kitâb Emine Hatun bt. Abdullah mahzarında üzerine da‘vâ ve takrîr-i kelâm edip müteveffât-ı mezbûrenin terekesinden mahalle-i mezbûrede vâki‘ bir tarafdan Ümmühani Hatun tasarrufunda olan vakıf menzil ve bir tarafdan Hasan Çelebi mülkü ve bir tarafdan Havva Hatun mülkü ve bir tarafdan tarîk-i âm ile mahdûd büyût-ı adîdeyi müştemil <> nısf menzil ile eşyâ-i memlûkesinden beş tencere ve on iki sahan ve üç yemenî yastık ve dört kadife yastık ve üç beledî yastık ve sekiz minder ve bir kaliçe ve bir yan keçesi ve iki yemenî yorgan ve iki kumaş yorgan ve bir leğen ve bir ibriğine bi-gayr-ı hakkın vaz‘-ı yed edip bana teslîmden imtinâ‘ eder suâl olunsun dedikde gıbbe’s-suâl mezbûre Emine Hatun cevâbında zikr olunan nısf menzil ile eşyâ-i merkūmeyi müteveffât-ı mezbûre Âişe Hatun bt. Abdullah hayâtında işbu bin yüz on senesi Muharremi’nin dördüncü günü safka-i vâhide ile iki yüz guruşa bana huzûr-ı Müslimînde bey‘ ve teslîm edip yedime hâlâ mahmiye-i mezbûrede Bâb Mahkemesi’nde nâibü’ş-şer‘ olan es-Seyyid Yusuf Efendi’nin imzâsıyla mümzât işbu hüccet-i şer‘iyyeyi def‘ etmekle mülk-i müşterâm olmuşdur deyü def‘le mukābele ve mazmûnu min-külli’l-vücûh takrîr-i meşrûhuna hüccet-i şer‘iyye ibrâz edip vekîl-i mezbûr muvâcehesinde feth ü kırâet olundukda gıbbe’l-istintâk ve’l-inkâr müdde‘iye-i mezbûreden müdde‘âsına beyyine taleb olundukda udûl-ı ahrâr-ı Müslimînden mahalle-i mezbûrede sâkin zeyl-i hüccet-i merkūmede mastûrü’l-ism el-Hâc Osman Ağa b. Ali ve Müezzin Mehmed Çelebi b. Halil li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffât-ı mezbûre Âişe Hatun bt. Abdullah zikr olunan nısf menzil ile eşyâ-i merkūmeyi müdde‘iye-i mezbûre Emine Hatun’a huzûrumuzda iki yüz guruşa bey‘ ve teslîm edip yedine işbu hüccet-i şer‘iyyeyi def‘ eyledi biz bu husûsa bu vech üzere kezâlik [şehâdetleri] makbûle olmağın mûcebiyle ba‘de’l-hükm kayd-şüd. Fî 19 min-Safer sene 1110 Şuhûdü’l-hâl: Abdülkerim Efendi b. Ali, İbrahim Çelebi b. Ali, Kırcalı Mehmed Çelebi b. Receb, Osman Efendi b. Şa‘bân, Şevki Çelebi b. Abdullah ve gayruhum.