Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 263 Hüküm no: 161 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Drama Zabiti Hasan Bey’in varislerinin miras hakları ve alacaklarını Veli Ağa’dan teslim aldıkları Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen irsâl olunan Mevlânâ el-Hâc Abdurrahman Efendi b. Mustafa mahmiye-i İstanbul’da Bahçekapısı kurbünde Hobyar mahallesi ahâlîsinden olup Vilâyet-i Rumeli’nde Drama zâbiti iken müsâfiren vefât eden Hasan Bey b. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkeleri Hadîce Hatun bt. Abdullah ve Emine Hatun bt. Abdullah ile sulbiye kızları Hanife ve Fâtıma ve Âişe ve Havva nâm sagīrelere münhasıra olduğu şer‘an zâhir ve müte‘ayyin oldukdan sonra zâtı mahalle-i mezbûre ahâlîsinden Halil Efendi b. Ahmed ve Mustafa Bey b. Ömer ta‘rîfleriyle mu‘arrefe olan mezbûre Hadîce ve Emine hatunlar asâleten ve mezbûre Havva nâm sagīrenin vâlidesi ve tesviye-i umûruna kıbel-i şer‘den mansûbe vasiyesi olup zâtı mu‘arrifân-ı mezbûrân ta‘rîfleriyle mu‘arrefe olan Şahbaz Hatun bt. Abdullah vesâyeten ve zikr olunan Hanife ve Fâtıma ve Âişe’nin vâlideleri ve tesviye-i emrlerine mezbûre Hadîce vasiye-i mansûbeleri olmağla vesâyeten meclis-i ma‘kūd-ı mezkûrda mahmiye-i mezbûrede Elvanzâde mahallesi ahâlîsinden işbu hâfızü’l-kitâb el-Hâc Veli Ağa b. Musa mahzarında her biri ikrâr ve takrîr-i kelâm edip zevcimiz müteveffâ-yı mezbûr zimmetinde mütekarrir ve ma‘kūdun-aleyh sekizer bin çürük akçe-i nikâhımızı ve müteveffâ-yı mezbûrun terekesinden ba‘de ihrâci’l-mesârif ve’d-düyûn ve’s-sülüs sümün hissemizi ve zikr olunan sagīrelerin hisselerini da‘vâ ve talebe ve ahz u kabza ve bize îsâle tarafımızdan mezbûr el-Hâc Veli Ağa müseccel vekîlimiz olmağla bi’l-vekâle ahz u kabz etmiş idi el-hâletü hâzihi zikr olunan sekizer bin akçe-i nikâhımızı ve defter-i kassâm-ı askerî mûcebince otuzar bin altışar yüz yirmi altışar akçe nısf sümün hissemizi ve cem‘an sagīrlerin hissesi olan dört yük yirmi sekiz bin yedi yüz altmış sekiz akçeyi vekîl-i mûmâ-ileyh el-Hâc Veli Ağa’dan her birimiz asâleten ve vesâyeten bi’t-tamâm ahz u kabz eyledik ba‘de’l-yevm mezbûr el-Hâc Veli Ağa yedinde ve zimmetinde bir akçe ve bir habbe bizim ve sagīrlerin bir habbesi kalmamışdır dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Ahmed Çelebi b. Süleyman ve Mehmed b. Ahmed ile meclis-i şer‘a [46b] gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 10 min-Safer sene 1110 Şuhûdü’l-hâl: Fahrü’l-kitâb İbrahim Efendi b. Hüseyin, Fahrü’l-a‘yân İsmail Bey b. İbrahim Terekecibaşı, Ali Hoca b. Ahmed, İbrahim Çelebi b. Mustafa, Çukadâr Mehmed Bey b. Hasan, İbrahim Beşe b. Mehmed, Abdülaziz b. Abdürrezzak, Mustafa Bey b. Murtaza Pazarî, Mehmed Bey b. Mustafa tâbi‘-i terekecibaşı ve gayruhum.