Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 264 Hüküm no: 162 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Drama Zabiti Hasan Bey’in varisleri, murislerinin Yağlıkçı Mustafa’daki alacağını tahsil ettikleri Kezâlik akd-i meclis-i şer‘-i şerîf ettikde müteveffâ-yı mezbûrun verâseti zevce-i menkûha-i metrûkeleri Hadîce Hatun bt. Abdullah ile Emine Hatun bt. Abdullah’a ve sagīre kızları Hanife ve Fâtıma ve Âişe ve Havva’ya münhasıra ve tashîh meselesi otuz iki sehmden olmağla sihâm-ı mezbûrenin ikişer sehmi zevceleri mezbûre Hadîce ve Emine Hatun’dan her birine ve bâkī yirmi sekiz sehmin yedişer sehmi kızları mezbûrelerden her birine isâbet ettiği şer‘an zâhir ve mütebeyyin oldukdan sonra zâtı mahalle-i mezbûre ahâlîsinden Halil Efendi b. Ahmed ve Mustafa Bey b. Ömer ta‘rîfleriyle mu‘arrefe olan mezbûre Hadîce ve Emine asâleten ve zikr olunan Hanife ve Fâtıma ve Âişe’nin vâlideleri ve tesviye-i emrlerine kıbel-i şer‘den mezbûre Hadîce vasiye-i mansûbeleri olmağla vesâyeten ve zâtı mu‘arrifân-ı mezbûrân ta‘rîfleriyle mu‘arrefe olan sagīre-i mezbûre Havva’nın vâlidesi ve tesviye-i umûruna vasiye-i mansûbesi Şahbaz Hatun bt. Abdullah vesâyeten meclis-i ma‘kūd-ı mezkûrda mahmiye-i mezbûrede Demirkapı kurbünde Dâye Hatun mahallesinde sâkin işbu hâfızü’l-kitâb müteveffâ-yı mezbûrun medyûnu Yağlıkçı el-Hâc Mustafa b. Mehmed mahzarında her biri asâleten ve vesâyeten ikrâr ve takrîr-i kelâm edip müteveffâ-yı mezbûr Hasan Bey b. Abdullah b. Abdullah’ın cihet-i karzdan bâ-temessük mezbûr el-Hâc Mustafa zimmetinde hakkı olup defter-i kassâm-ı askerîde tahrîr olunan bin altı yüz elli guruş ki her para dört hesâbı üzere iki yük altmış dört bin akçeden ba‘de ihrâci’l-mesârif ve’d-düyûn ve’s-sülüs ber-mûceb-i defter-i kassâm-ı askerî tashîh-i mezbûr üzere her birimize isâbet eden hisse-i irsiyelerimiz ile sagīrelerin hisselerini mezbûr el-Hâc Mustafa’dan bi-kadri’l-hısâs tamâmen alıp kabz eyledik min-ba‘d meblağ-ı mezbûrdan mezbûr el-Hâc Mustafa yedinde ve zimmetinde bir akçe bâkī kalmadı dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr kezâlik i‘lâm etmeğin mâ-vaka‘a kayd-şüd. Fî 10 min-Safer sene 1110 Şuhûdü’l-hâl: Es-sâbikūn.