Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 267 Hüküm no: 165 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe’nin varislerinden kardeşi Mehmed Beşe terekedeki hissesini sulh yoluyla vasiden teslim aldığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘den me’zûnen Mevlânâ İsmail Efendi el-merhûm es-Seyyid Ahmed Efendi irsâl olunup ol dahi mahmiye-i İstanbul’da Mimârayas mahallesinde sâkin el-Hâc Süleyman b. Hasan’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahmiye-i mezbûrede Mimârsinan mahallesinde sâkin iken bundan akdem vefât eden Ahmed Beşe b. Hasan’ın verâseti li-ebeveyn er karındaşı Mehmed Beşe ve li-ebeveyn kız karındaşları Şehrî ve Emine ve Cennet nâm hatunlara münhasıra olup tashîh meselesi bi-tarîkı’l-bast beş sehmden olmağla sihâm-ı mezbûreden iki sehmi mezbûr Mehmed’e ve bir sehmi mezbûrât Şehrî ve Emine ve Cennet nâm hatunlardan her birine isâbeti tahakkukundan sonra mezbûr Mehmed meclis-i ma‘kūd-ı mezbûrda tereke-i müteveffâ-yı mezbûra bi’l-vesâye vaz‘-ı yed eden işbu râfi‘ü’l-kitâb mezbûr el-Hâc Süleyman mahzarında ikrâr ve takrîr-i kelâm edip mûrisim müteveffâ-yı mezbûrun terekesinden el-Hâc Süleyman’ın makbûzu olan para dörder hesâbı üzere altı bin dört yüz akçeden hisse-i şer‘iyyeme isâbet eden iki bin beş yüz altmış akçeyi taleb ve da‘vâ eylediğimde beynimize muslihûn tavassut edip da‘vâ-yı mezkûremden beni el-Hâc Süleyman ile para dörder akçe hesâbı üzere iki bin iki yüz kırk akçe üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr iki bin iki yüz kırk akçeyi mezbûr el-Hâc Süleyman yedinden tamâmen alıp kabz eyledim min-ba‘d tereke-i müteveffâ-yı mezbûrdan hisse-i şer‘iyyeme müte‘allıka âmme-i da‘vâdan mezbûr el-Hâc Süleyman’ın zimmetini ibrâ-i âmm-ı kâtı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Mehmed b. Hüseyin ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 14 Safer sene 1110 Şuhûdü’l-hâl: Süleyman Çelebi b. el-Hâc Ramazan, Musa Beşe b. Ebubekir, Hüseyin Çelebi b. Hasan, Mustafa Odabaşı b. Ali, el-Hâc Mehmed b. Musa, Mehmed b. Osman, İbrahim b. Ömer ve gayruhum.