Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 266 Hüküm no: 164 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Çoban Kirkor’un Danik zimmideki parasının Beytülmâl Emini Mustafa Ağa tarafından alınıp terekeye dahil edildiği Husûs-ı âti’l-beyânın mahallinde istimâ‘ ve tahrîri içün bi’l-iltimâs savb-ı şer‘-i enverden me’zûnen irsâl olunan el-Hâc Abdurrahman Efendi b. Mustafa mahmiye-i İstanbul’da Hadîka-i hâssa-i şehriyârîde vâki‘ Yalıköşkü’ne varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde mahrûse-i Üsküdar muzâfâtından Gebze nâhiyesine tâbi‘ Demirciler’de sâkin iken bundan akdem vefât hâlik olan çoban tâifesinden Kirkor v. Dimitri nâm zimmînin zâhirde vâris-i ma‘rûfu olmayıp cemî‘ terekesi cânib-i beytülmâle âid oldukdan sonra hadîka-i mezkûrede bi’l-fi‘il bostancıbaşı ve bâ-hatt-ı hümâyûn-ı sa‘âdet-makrûn bilâ-vâris fevt olanların terekelerini kabza memûr olan umdetü’l-havâs ve’l-mukarrebîn mu‘temedü’l-mülûk ve’s-selâtîn hâfızü’l-kitâb izzetlü Mustafa Ağa b. Hüseyin meclis-i ma‘kūd-ı mezbûrda yine çoban tâifesinden olup gāib ani’l-meclis hâlik-i mersûmun mûdi‘i Danik v. Anderya v. Vaho nâm zimmî tarafından husûs-ı âti’l-beyânda husûmet ve redd-i cevâba vekîl olduğu zikr olunan Gebze ahâlîsinden Mehmed b. Ahmed ve Yusuf b. Abdullah nâm kimesneler şehâdetleriyle mahzar-ı hasm-ı câhidde sâbit olup sübût-ı vekâletine hükmolunan Gebze kasabası ahâlîsinden el-Hâc Ömer b. İbrahim mahzarında üzerine da‘vâ ve takrîr-i kelâm edip hâlik-i merkūm İstanbul bostancıbaşıları korusu sınırı dâhilinde bulunup bu makūlelerin beytülmâllerini kabza taraf-ı Saltanat-ı aliyye’den ben memûr olmağla hâlik-i mezbûrun müvekkil-i mersûm Dano zimmî zimmetinde olan doksan dört guruşu cânib-i beytülmâle âid olmağla vekîl-i merkūmdan taleb eylediğimde bana teslîmden imtinâ‘ eder suâl olunsun dedikde gıbbe’s-suâl vekîl-i merkūm cevâbında müvekkil-i merkūm Dano zimmînin meblağ-ı mezbûra vech-i muharrer üzere vaz‘-ı yedini ikrâr ve müdde‘î-i müşârün-ileyhin vech-i meşrûh üzere müdde‘âsını inkâr edicek müdde‘î-i mûmâ-ileyhden sıdk-ı makāline beyyine taleb olundukda udûl-ı ahrâr-ı ricâl-i Müslimînden hadîka-i mezbûre ahâlîsinden Salih Haseki b. Mustafa ve el-Hâc Mehmed b. Yusuf li-ecli’ş-şehâde meclis-i ma‘kūd-ı mezkûra hâzırân olup isre’l-istişhâd fi’l-hakīka hâlik-i mersûm Kirkor v. Dimitri nâm zimmî İstanbul bostancıbaşıları korusu sınırı dâhilinde hâlik olmağla zâhirde vâris-i ma‘rûfu olmayıp terekesi cânib-i beytülmâle âid olmağın hâlik-i mezbûrun müvekkil-i merkūm yedinde vedî‘a olan doksan dört guruşunu ağa-i müşârün-ileyh Mustafa Ağa hazretleri içün işbu vekîl-i merkūm el-Hâc Ömer’den bâ-hatt-ı hümâyûn-ı sa‘âdet-makrûn hakk-ı taleb ve ahz vardır biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm müdde‘î-i müşârün-ileyh meclis-i ma‘kūd-ı mezbûrda merkūm el-Hâc Ömer mahzarında bi’l-emâne ikrâr ve takrîr-i kelâm edip hâlik-i merkūmun müvekkil-i merkūm Dano zimmî yedinde vedî‘a olup ânifen edâsına hükm-i şer‘î lâhık olan doksan dört guruşu vekîl-i merkūm yedinden bi’l-emâne ahz u kabz eyledim min-ba‘d meblağ-ı mezbûrdan vekîl-i merkūm yedinde ve müvekkil-i mersûm zimmetinde bir akçe bâkī kalmadı dedikde gıbbe’t-tasdîkı’ş-şer‘î vâki‘ kezâlik inhâ ve takrîr etmeğin mâ-vaka‘a kayd-şüd. Fî 20 min-Saferi’l-hayr sene 1110 Şuhûdü’l-hâl: Osman Haseki b. Mehmed, İbrahim Efendi b. Hüseyin, İbrahim Efendi b. Murad, Ali Haseki b. Ahmed, İbrahim Çelebi b. Receb