Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 273 Hüküm no: 169 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ayşe Hatun’un küçük çocuklarına babaları Mehmed Çelebi’nin vasi tayin edildiği Mahmiye-i İstanbul’da Kocamustafapaşa kurbünde Duhânîzâde mahallesinde sâkine iken bundan akdem vefât eden Âişe Hatun bt. Ali’nin sadriye-i sagīre kızları Hadîce ve Ümmühani’nin tesviye-i emrlerine kıbel-i şer‘den bir vasî nasb olunmak lâzım ve mühim olmağın emânet ve diyânet ile ma‘rûf olup vesâyet uhdesinden gelmeğe kādir idiği zeyl-i vesîkada muharrerü’l-esâmî Müslimîn haberleriyle lede’ş-şer‘ zâhir ve mukarrer olan sagīretân-ı mezbûretânın babaları hâfızü’l-kitâb Mehmed Çelebi b. Mustafa’yı hâkim-i muvakkı‘-i sadr-ı kitâb tûbâ-lehû ve hüsnü-meâb efendi zikr olunan sagīrelerin tesviye-i emrlerine vakt-i rüşd ü sedâdlarına değin vasî nasb ü ta‘yîn buyurup ol dahi vesâyet-i mezbûre[yi] kabûl ve merâsimini edâya ta‘ahhüd ve iltizâm etmeğin kayd-şüd. Fî gurre-i Safer sene 1110 Şuhûdü’l-hâl: Fahrü’l-a‘yân Osman b. Ömer, el-Hâc İbrahim b. Receb, Ahmed Beşe b. Receb, Mehmed Beşe b. Ali, Yusuf Beşe b. Mehmed.