Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 274 Hüküm no: 171 Orijinal metin no: [48b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un varislerinden annesi Hatice’nin hissesini kendisine bakmak şartıyla damadı Mehmed Çelebi’ye hibe ettiği Husûs-ı âti’l-beyânın mahallinde ketb ü tahrîr[i] iltimâs olunmağın savbı şer‘den me’zûnen Mevlânâ Rûşenî Mehmed Efendi irsâl olunup ol dahi mahmiye-i İstanbul’da Kocamustafapaşa kurbünde Duhânîzâde mahallesinde sâkine iken bundan akdem vefât eden Âişe Hatun bt. Ali’nin menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffât-ı mezbûrenin verâseti zevc-i metrûku Mehmed Çelebi b. Mustafa ile vâlidesi Hadîce Hatun bt. Abdullah’a ve sadriye-i sagīre kızları Hadîce ve Ümmühani’ye münhasıra ve tashîh-i meselesi bi-hükmi’l-kabûl on üç sehmden olup sihâm-ı mezbûrenin üç sehmi zevci mezbûr Mehmed Çelebi’ye ve iki sehmi vâlidesi mezbûre Hadîce’ye ve dörder sehmi kızları mezbûretân Hadîce ve Ümmühani’den her birine isâbet ve intikāl eylediği şer‘an zâhir oldukdan sonra zâtı mahalle-i mezbûre sükkânından fahrü’l-a‘yân Osman Ağa b. el-Hâc Ömer ve Ahmed Beşe b. Receb ta‘rîfleriyle mu‘arrefe olan vâlidesi mezbûre Hadîce Hatun meclis-i ma‘kūd-ı mezbûrda müteveffât-ı mezbûrenin zevci ve terekesine bi’l-verâse vaz‘-ı yed eden hâfızü’l-kitâb mezbûr Mehmed Çelebi muvâcehesinde ikrâr ve takrîr-i kelâm edip kızım müteveffât-ı mezbûrenin terekesi tahrîr ve ber-mûceb-i defter-i kassâm-ı askerî ba‘de’l-ihrâcât menzilden mâ‘adâ tereke-i menkūlesinden tashîh-i mezbûr üzere bana isâbet eden para üçer hesâbına iki bin kırk iki akçe hakkım mezbûr Mehmed Çelebi’nin makbûzu olup ve mahalle-i mezbûre[de] vâki‘ lede’l-ahâlî ve’l-cîrân ma‘lûmü’l-hudûd mülk menzilinden dahi iki sehm-i şâyi‘imi mezbûr Mehmed Çelebi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bin üç yüz seksen dört sağ akçeye bey‘ ve teslîm ol dahi iştirâ ve tesellüm edip semeni olan meblağ-ı mezbûr bin üç yüz seksen akçe ile terekeden makbûzu olan iki bin kırk iki akçe ki min-haysü’l-mecmû‘ üç bin dört yüz kırk altı akçeyi mezbûr Mehmed Çelebi beni infâk ve iksâ etmek üzere hîbetü’d-deyn mimmen aleyhi’d-deyn sahîhatün fehvâsınca mezbûr Mehmed Çelebi’ye hîbe ve temlîk ol dahi vech-i muharrer üzere ittihâb ve temellük ve kabûl eyledi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an mürsel Nasuh Çelebi b. Yusuf ile meclis-i şer‘a gelip alâ-vukū‘ihi inhâ. Fi’t-târîhi’l-mezbûr.