Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 290 Hüküm no: 177 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Çelebi’nin varislerinin, mûrislerinin ortağı Ali’deki haklarını aldıkları Husûs-ı âti’l-beyânın mahallinde ketb ü tahrîr[i] içün bi’l-iltimâs savb-ı şer‘-i enverden me’zûnen irsâl olunan Mevlânâ Velizâde Mehmed Efendi mahmiye-i İstanbul’da Yavaşça Şahin mahallesinde sâkin iken bundan akdem vefât eden es-Seyyid <<Ömer>> Derviş Çelebi b. es-Seyyid Ali’nin hayâtında şerîki el-Hâc Ahmed’in menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf ettikde müteveffâ-yı mezbûrun zevce-i menkûha-i metrûkesi Hadîce Hatun bt. Fazlullah’a ve babası es-Seyyid Ali Çelebi b. Mehmed’e münhasıra olup ve tashîh meselesi dört sehmden olmağla sihâm-ı mezbûrenin bir sehmi mezbûre Hadîce Hatun’a ve bâkī üç sehmi usûbeten babası mezbûr es-Seyyid Ali Çelebi’ye isâbet eylediği şer‘an zâhir ve mütebeyyin oldukdan sonra mezbûr es-Seyyid Ali Çelebi asâleten ve mezbûre Hadîce Hatun bt. Fazlullah b. Mehmed tarafından husûs-ı âti’l-beyânda da‘vâ ve taleb ve ahz u kabza ve rub‘ hissesini îsâle ve lede’l-hâce sulh ve ibrâya vekîl olduğu zât-ı mezkûreyi ma‘rifet-i şer‘iyye ile ârifân Kızlar Ağası mahallesinde sâkin Receb Ağa b. Ali ve Hoca Hayreddin mahallesinde sâkin Ramazan Ağa b. Mehmed nâm mu‘arrifler şehâdetleri ile mahzar-ı hasm-ı câhidde sâbit olup sübût-ı vekâletine hükm-i şer‘î lâhık olan Kızlar Ağası mahallesinde sâkin Hüseyin Ağa b. Murad vekâleten meclis-i ma‘kūd-ı mezkûrda müteveffâ-yı mezbûrun hayâtında peştemâlcılık san‘atında şirket-i inân ile şerîki işbu hâfızü’l-kitâb mezbûr el-Hâc Ahmed mahzarında ikrâr ve takrîr-i kelâm edip müteveffâ-yı mezbûr Derviş Çelebi’nin Mısr-ı Kāhire’de şerîki gāib ani’l-meclis el-Hâc İbrahim nâm kimesnenin zimmetinde olan asıl sermâyesi iki bin yüz para ve fâideden hâsıl olan iki bin yedi yüz yirmi altı para ki cem‘an dört bin sekiz yüz yirmi altı paradan tashîh-i mezbûr üzere her birimize isâbet eden hissemizi meblağ-ı mezbûra bi’l-emâne vaz‘-ı yed eden mezbûr el-Hâc Ahmed yedinden bi-kadri’l-hısâs tamâmen ahz u kabz eyledik min-ba‘d meblağ-ı mecmû‘-ı mezbûr dört bin sekiz yüz yirmi altı paradan mezbûr el-Hâc Ahmed yedinde ve zimmetinde bir akçe hakkımız bâkī kalmadı dediklerinde gıbbe’t-tasdîkı’ş-şer‘î mezbûrân es-Seyyid Ali Çelebi ve Hüseyin Ağa meclis-i ma‘kūd-ı mezkûrda mezbûr el-Hâc Ahmed mahzarında her biri ikrâr ve takrîr-i kelâm edip müteveffâ-yı mezbûrun asıl sermâyesi olan iki bin yüz para ile fâide olan iki bin yedi yüz yirmi altı paradan mâ‘adâ mezbûr el-Hâc Ahmed zimmetinde müteveffâ-yı mezbûrun <> iki yüz guruşu dahi vardır ve ba‘zı eşyâsını ki ihfâ eylemişdir deyü mezbûr el-Hâc Ahmed[den] da‘vâ ettiğimizde beyyinemiz olmamağla mezbûr el-Hâc Ahmed’e yemîn teklîf ettiğimizde ol dahi yemîn sadedinde iken beynimize muslihûn tavassut edip [52a] mezbûr el-Hâc Ahmed ile nakd yirmi guruş üzerine inşâ-i akd-i sulh eylediklerinde biz dahi sulh-ı mezkûru kabûl ve bedel-i sulh olan yirmi guruşu dahi bi-kadri’l-hısâs mezbûr el-Hâc Ahmed yedinden tamâmen ahz u kabz eyledik ba‘de’l-yevm müteveffâ-yı mezbûrun terekesinden hissemize isâbet eden cemî‘ mîrâs da‘vâsından her birimiz asâleten ve vekâleten mezbûr el-Hâc Ahmed’in zimmetini ibrâ-i âmm-ı kâtı‘u’n-nizâ‘la ibrâ ve iskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an ba‘s olunan Mehmed b. Hüseyin ve Mehmed b. Ahmed ile meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a kayd-şüd. Fî 24 min-Saferi’l-hayr sene 1110 Şuhûdü’l-hâl: es-Seyyid el-Hâc Hasan b. es-Seyyid Ali, Mehmed Çelebi b. el-Hâc Ali, Receb Çelebi b. Süleyman, Şeyh Ataullah Efendi b. Şahabeddin, Mehmed Beşe b. Halil, es-Seyyid Mehmed Çelebi b. el-Hâc İbrahim, es-Seyyid Mustafa Efendi b. Receb, es-Seyyid Sunullah Efendi b. Yahya