Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 291 Hüküm no: 178 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Fatıma Hatun’un çocuklarına babaları Doğramacı Ali Beşe’nin vasi tayin edildiği Mahmiye-i İstanbul’da Yenibahçe kurbünde Kırkodalar denmekle ma‘rûf müteehhilîn odalarının birinde sâkine iken bundan akdem vefât eden Fâtıma Hatun bt. ( ) kızları Âişe ve Hadîce nâm sagīreler ile kebîr oğlu olup hâlâ Mısr-ı Kāhire’ye tâbi‘ Bulak’da sâkin Bâzergân Lütfullah Çelebi’nin hizmetinde olan Mustafa Çelebi nâm kimesnenin hisse-i irsiyesini ber-mûceb-i defter-i kassâm ahz u kabz ve zabta ve zikr olunan sagīrlerin tesviye-i emrlerine kıbel-i şer‘den bir vasî nasbı lâzım ve mühim olmağın sagīretân-ı mezbûretânın ve mezbûr Mustafa’nın babaları olup vesâyete her vechile ehil olduğu zeyl-i kitâbda muharrerü’l-esâmî Müslimîn haberleriyle lede’ş-şer‘ zâhir olan işbu hâfızü’l-kitâb Doğramacı Ali Beşe b. Mustafa’yı hâkim-i muvakkı‘-i sadr-ı kitâb tûbâ-lehû ve hüsnü-meâb efendi tesviye-i umûr-ı sagīre-i mezbûrelerin vakt-i rüşd ü sedâdlarına varınca ve gāib-i mezbûrun hisse-i mevkūfesini zabt ve hıfza vasî nasb ü ta‘yîn buyurdukda ol dahi vesâyet-i mezbûreyi kabûl ve merâsimini edâya müte‘ahhid olmağın mâ-vaka‘a kayd-şüd. Fî 20 min-Safer sene 1110 Şuhûdü’l-hâl: el-Hâc Mustafa Ağa b. el-Hâc Ali, el-Hâc Ahmed Efendi b. Muslu İmâm-ı mahalle-i Sarıdemirci, Ahmed Çelebi b. Ömer Efendi Müezzin-i mahalle-i mezbûre, Mehmed Beşe b. Mustafa Duhânî, Ahmed Beşe b. Mahmud, Yusuf Beşe b. Abdullah