Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 293 Hüküm no: 181 Orijinal metin no: [52a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Keresteci Mehmed Çelebi’nin vefat eden Cerrâh Halil Çelebi’de olan alacağının terekeden tahsili Mahmiye-i İstanbul’da Davudpaşa mahallesinde sâkin keresteci tâifesinden işbu bâ‘isü’l-kitâb Mehmed Çelebi b. Ebubekir mahfil-i kazâda mahmiye-i mezbûrede Kâtib Muslihiddin mahallesi ahâlîsinden olup mahrûse-i Edirne’de düyûnu terekesinden ezyed olduğu hâlde fevt olan Cerrâh Halil Çelebi b. İbrahim’in tesviye-i umûruna vasiyy-i mansûbu olmağla terekesine vaz‘-ı yed eden Mehmed Çelebi b. Süleyman mahzarında üzerine da‘vâ ve takrîr-i kelâm edip müteveffâ-yı mezbûr Cerrâh Halil Çelebi b. İbrahim zimmetinde yedimden müşterâ ve makbûz kereste bahâsından ba‘de külli’l-hesâb kırk altı guruş hakkım olup hattâ hâl-i kemâl-i sıhhatinde Edirne’ye gider oldukda cihet-i merkūmeden zimmetinde bana reddi vâcib ol kadar guruş deyni olduğunu huzûr-ı Müslimînde ikrâr ve işhâ[d] etmiş iken meblağ-ı mezbûru kable’t-teslîm fevt olmağın tereke-i kāsırasından taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsına beyyine taleb olundukda udûl-ı Müslimînden sâbıku’l-beyân Davudpaşa mahallesinde sâkin Yahya b. İsmail ve Yusuf b. Abdullah li-ecli’ş-şehâde mahfil-i şer‘a hâzırân olup isre’l-istişhâd fi’l-hakīka müteveffâ-yı mezbûr Cerrâh Halil Çelebi b. İbrahim hâl-i kemâl-i sıhhatinde Edirne’ye gider oldukda işbu müdde‘î-i mezbûr Mehmed Çelebi’ye yedinden müşterâ ve makbûz kereste bahâsından ba‘de külli’l-hesâb zimmetinde reddi vâcib kırk altı guruş deyni olduğunu huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle [52b] olmağın gıbbe’t-tahlîf mûcebiyle ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min-Muharremi’l-harâm li-seneti aşer ve mi’e ve elf. Şuhûdü’l-hâl: Yahya Efendi b. Mustafa, Nuh Efendi b. Musa, Şeyh Mehmed Efendi b. Sunullah, Abdurrahim [b.] Aziz Efendi