Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 294 Hüküm no: 182 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehit Kolağası Abbas Ağa’nın varislerinin alacak iddiasıyla İbrahim Beşe’ye açtıkları davada haksız bulundukları Mahmiye-i İstanbul’da Molla Hüsrev mahallesi ahâlîsinden ve Dergâh-ı âlî yeniçerileri ocağında kul kethüdâsı olup işbu sene-i mübârekede Nemçe keferesi ma‘rekesinde şehîden vefât eden Abbas Ağa b. Şahin Mehmed’in verâseti kebîre kızı Atike Hatun ile sagīr oğlu Ebubekir’e münhasıra olduğu şer‘an zâhir oldukdan sonra sagīr-i mezbûrun tesviye-i umûruna kıbel-i şer‘den mansûbe vasiyesi mezbûre Atike Hatun tarafından husûs-ı âti’l-beyânda müseccel vekîli Halil Odabaşı b. Abdullah mahfil-i kazâda mahmiye-i mezbûrede Karabaş mahallesinde sâkin müteveffâ-yı mezbûrun hayâtında tüfenkçibaşısı işbu bâ‘isü’l-kitâb el-Hâc İbrahim Beşe b. el-Hâc Mehmed mahzarında bi’l-vekâle üzerine da‘vâ ve takrîr-i kelâm edip müteveffâ-yı mezbûr Abbas Ağa b. Şahin Mehmed’in mezbûr el-Hâc İbrahim Beşe zimmetinde cihet-i karz-ı şer‘îden üç yüz guruş hakkı olup meblağ-ı mezbûru kable’l-ahz fevt olmağla mezbûr İbrahim Beşe’den bi’l-vekâle taleb ederim suâl olunsun dedikde gıbbe’s-suâl mezbûr İbrahim Beşe cevâbında zimmetim olan meblağ-ı mezbûr üç yüz guruşu târîh-i kitâbdan dokuz ay mukaddem Şente nâm mevzi‘de huzûr-ı Müslimînde müteveffâ-yı mezbûra tamâmen def‘ u teslîm ol dahi yedimden alıp kabz etmekle meblağ-ı mezbûr talebinden zimmetim berî olmuşdur deyü def‘le mukābele ve istintâk olunsun dedikde gıbbe’l-istintâk ve’l-inkâr mezbûr el-Hâc İbrahim Beşe’den def‘-i meşrûhuna beyyine taleb olundukda udûl-ı Müslimînden merhûm-ı mezbûrun etbâ‘ından Karabaş mahallesinde sâkin Mustafa Beşe b. Ahmed ve Ahmed Beşe b. Ömer li-ecli’ş-şehâde meclis-i şer‘a hâzırân [olup] istişhâd olundukda fi’l-hakīka müteveffâ-yı mezbûr Abbas Ağa b. Şahin Mehmed’in işbu müdde‘î-i mezbûr el-Hâc İbrahim Beşe zimmetinde cihet-i karzdan olan üç yüz guruşu târîh-i kitâbdan dokuz ay mukaddem mevzi‘-i mezbûrda bizim huzûrumuzda tamâmen def‘ u teslîm ol dahi yedinden alıp kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm kayd-şüd. Fî 3 Zilka‘de sene 1109 Şuhûdü’l-hâl: Mukayyid Mustafa Efendi b. Mehmed, es-Seyyid Abdülmuti Efendi b. ( ), Uşşâkī Mehmed Efendi, Hasan Çelebi b. Abdullah