Kısmet-i Askeriye Mahkemesi 19 Numaralı Sicil (H. 1109-1110 / M. 1698-1699) cilt: 58, sayfa: 298 Hüküm no: 187 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Selîme Hatun’un mehir bedelinin vefat eden Abdurrahman Ağa’nın terekesinden ödenmesi Husûs-ı âti’l-beyânın mahallinde istimâ‘ ve tahrîri iltimâs olunmağın cânib-i şer‘den me’zûnen Mevlânâ Mehmed Efendi b. Mahmud irsâl olunup ol dahi mahmiye-i İstanbul’da Evliyâ mahallesinde sâkine Saraylı Hadîce Hatun bt. Abdullah b. Abdullah’ın menziline varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i âlî ettikde mezbûre Saraylı Hadîce’nin zevci olup devletlü sa‘âdetlü Beyhan Sultan dâmet-ismetuhâ ve istakarret-azametühâ hazretlerinin kethüdâları iken bundan akdem vefât eden Abdurrahman Ağa b. Şa‘bân b. Abdullah’ın kebîr oğlu Mehmed Ağa asâleten ve sagīr oğlu Ahmed ile sagīre kızları Âişe ve Fâtıma’nın tesviye-i emrlerine kıbel-i şer‘den mansûb vasîleri Ali Efendi b. Ahmed vesâyeten meclis-i ma‘kūd-ı mezkûrda tereke-i müteveffâ-yı mezbûra bi’l-verâse vaz‘-ı yed eden mezbûre Saraylı Hadîce tarafından husûs-ı âti’l-beyânda husûmet ve redd-i cevâba müseccel vekîli el-Hâc Hüseyin b. Ebubekir mahzarında her biri üzerine da‘vâ ve takrîr-i kelâm edip müteveffâ-yı mezbûr Abdurrahman Ağa’nın zevce-i menkûhası olup kendinden mukaddem vefât eden Selîme Hatun bt. Resul’un müteveffâ-yı mezbûr zimmetinde kırk bin sağ akçe hakkı olup hattâ meblağ-ı mezbûr cihet-i merkūmeden zimmetinde deyni olduğunu hâl-i kemâl-i sıhhatinde fevtinden dokuz ay mukaddem huzûr-ı Müslimînde ikrâr ve işhâd edip meblağ-ı mezbûrun on bin akçesi irsen kendüye isâbet edip ve otuz bin akçesi müteveffât-ı mezbûrenin evlâdı merkūmûn Mehmed Ağa ve Ahmed Ağa ve Âişe ve Fâtıma’ya isâbet etmekle kable’l-edâ fevt olmağın terekesinden taleb ederiz suâl olunsun dedikde gıbbe’s-suâl vekîl-i mezbûr cevâbında müvekkilesinin tereke-i müteveffâ-yı mezbûra ber-vech-i muharrer vaz‘-ı yedini ikrâr ve deyn-i merkūmu inkâr edicek müdde‘iyân-ı merkūmândan müdde‘âlarına beyyine taleb olundukda udûl-ı Müslimînden mahalle-i merkūme sâkinlerinden İmâm Abdullah Efendi b. Mahmud ve Mahmud Bey b. Resul li-ecli’ş-şehâde meclis-i ma‘kūd-ı mezkûra hâzırân olup istişhâd olundukda fi’l-hakīka müteveffâ-yı mezbûr Abdurrahman Ağa b. Şa‘bân b. Abdullah hâl-i kemâl-i sıhhatinde fevtinden dokuz ay mukaddem zevce-i menkûhası ve merkūmûn Mehmed Ağa ve Ahmed ve Âişe ve Fâtıma’nın vâlideleri olup kendiden mukaddem fevt olan Selîme Hatun bt. Resul’ün zimmetimde kırk bin sağ akçe mehr-i müecceli vardır deyü huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye ettikde ba‘de’t-ta‘dîl ve’t-tezkiye şehâdetleri makbûle olmağın mezbûr Mehmed Ağa ber-vech-i şer‘î üzere tahlîf olundukdan sonra mevkūfen alâ-yemînü’l-Gaffâr(?) mûcebiyle ba‘de’l-hükm vâki‘ hâli mevlânâ-yı mezbûr mahallinde tahrîr ve ma‘an ba‘s olunan Çukadâr el-Hâc Süleyman b. Hüseyin ve Hasan Çelebi b. Abdullah meclis-i şer‘a gelip alâ-vukū‘ihi inhâ ve takrîr etmeğin mâ-vaka‘a bi’t-taleb kayd-şüd. Fî 23 min-Safer sene 1110 Şuhûdü’l-hâl: Bostancı(?) Efendi b. Mehmed, el-Hâc Mehmed b. Ahmed, Haffâf el-Hâc Ahmed Çelebi b. Mehmed, Haffâf el-Hâc Ali b. Musa, İbrahim Çavuş, Ahmed Bey b. Mustafa